„შემოქმედებითი ევროპის“ ახალი საჯარო პანელი მის შედეგებს და სტატისტიკას ასახავს

რამდენი პროექტი და გრანტის მიმღები დაფინანსდა ევროკავშირის „შემოქმედებითი ევროპის“ პროგრამის ფარგლებში ბოლო წლებში? რომელ კულტურულ და შემოქმედებით სექტორებში აქტიურობდნენ ისინი და რომელ ქვეყნებში იმოგზაურეს ევროპაში და მის ფარგლებს გარეთ?

ეს და სხვა მონაცემები ახლა „შემოქმედებითი ევროპის“ მიერ შექმნილ ინტერაქტიულ პლატფორმაზეა ხელმისაწვდომი. პლატფორმა უზრუნველყოფს ეფექტიანობის ძირითად მაჩვენებლებზე და მონაცემებზე წვდომას ნებისმიერი დაინტერესებული პირისთვის. თანდართული გვერდი „შემოქმედებითი ევროპა რიცხვებში“ ხელმძღვანელობას გაგიწევთ პლატფორმაზე და გთავაზობთ მზა დინამიურ დიაგრამებს, რომლებიც პირველ ეტაპზე პროგრამის უამრავი მონაცემის გაცნობაში დაგეხმარებათ.

ამ ინსტრუმენტით ევროკომისია მიზნად ისახავს გამჭვირვალობის ხელშეწყობას და ცოდნის გაღრმავებას შემოქმედებითი ევროპის საქმიანობისა და მიღწევების შესახებ მონაცემთა ვიზუალიზაციის, დიაგრამებისა და დინამიური რუკების საშუალებით. მომხმარებლებს შეუძლიათ პროგრამის მონაცემების შესწავლა მორგებადი ფილტრების მხარდაჭერით, რაც მათ საშუალებას აძლევს საკუთარი მოგზაურობა კონკრეტულ ინტერესებს, მაგ., ქვეყანას ან კულტურულ და შემოქმედებით სექტორებს მოარგონ.

საინფორმაციო პანელის გამორჩეული მახასიათებელია მისი  სპეციალური განყოფილება კულტურის მიმართულებაზე, რომელიც იძლევა მხატვრებისა და კულტურის სფეროს პროფესიონალების მობილობის გაცნობის შესაძლებლობას მობილობის სქემის ფარგლებში სახელწოდებით „ევროპას კულტურა ამოძრავებს“ (Culture Moves Europe).

„შემოქმედებითი ევროპის“ 2021-2027 წლების პროგრამის ბიუჯეტი 2.44 მილიარდ ევროს შეადგენს, წინა წლების პროგრამის (2014-2020) 1.47 მილიარდ ევროსთან შედარებით. „შემოქმედებითი ევროპა“ ინვესტირებას ახორციელებს ისეთ საქმიანობაში, რომელიც აძლიერებს კულტურულ მრავალფეროვნებას და კულტურისა და შემოქმედებითი სექტორების საჭიროებებს და გამოწვევებს პასუხობს. ევროკავშირის არაწევრი ქვეყნებიდან „შემოქმედებითი ევროპის“ პროგრამაში მონაწილეობის მიღება შეუძლიათ სომხეთის, საქართველოს, მოლდოვისა და უკრაინის კულტურის სფეროს და შემოქმედებით ორგანიზაციებს.

დამატებითი ინფორმაცია

პრესრელიზი

შემოქმედებითი ევროპა რიცხვებში

შემოქმედებითი ევროპის საჯარო პანელი