საქართველოში ევროკავშირის მიერ დაფინანსებული სურსათის ბანკის პროექტი დაიწყო

15 მარტს თბილისში  ოფიციალურად დაიწყო ევროკავშირის მიერ დაფინანსებული პროექტი, „მდგრადი სასურსათო სისტემის დანერგვა საქართველოში სამოქალაქო საზოგადოების ჩართულობით“.

პროექტის გახსნის ღონისძიებას სხვადასხვა სახელმწიფო უწყების, არასამთავრობო და საერთაშორისო ორგანიზაციისა და კერძო სექტორის წარმომადგენლები ესწრებოდნენ.  

ევროკავშირის მიერ დაფინანსებული პროექტი უხელმძღვანელებს ინიციატივას, რომელიც მოწყვლად მოსახლეობას საკვებით ჭარბი სურსათის გადანაწილების გზით უზრუნველყოფს. პროექტი ასევე შეაფასებს „სურსათის დანაკარგებისა და მისი ნარჩენების შემცირების და სურსათის შეწირულების შესახებ“ ახალი კანონის გავლენას. კანონის მიზანი სურსათის ნარჩენების, ფერმერთა სურსათის დანაკარგების და სათბური აირების გამოყოფის შემცირებაა. 

პროექტის კიდევ ერთი მიზანი ადგილობრივი სამოქალაქო საზოგადოების წარმომადგენლების გაძლიერებაა, რათა მათ შეძლონ მოწყვლადი მოსახლეობისთვის სურსათის მიწოდება, ადგილობრივ ფერმერებთან თანამშრომლობა და სურსათის ნარჩენებისა და დანაკარგების შემცირების შესახებ ცნობიერების ამაღლების კამპანიების ჩატარება.

ევროკავშირისა და ჩეხეთის განვითარების სააგენტოს მიერ დაფინანსებული პროექტი, „მდგრადი სასურსათო სისტემის დანერგვა საქართველოში სამოქალაქო საზოგადოების ჩართულობით“, ხორციელდება საქართველოს წითელ ჯვართან (GRC), „პარკი არ მინდასა“ (PAM) და არასამთავრობო ორგანიზაცია Eliots Sustainability-ისთან თანამშრომლობით.

2023-2026 წლებში მოქმედი ინიციატივა სურსათის უსაფრთხოების, ნარჩენების მართვისა და კლიმატის ცვლილების შერბილების სფეროებში People in Need (PIN) ორგანიზაციისა და წითელი ჯვრის მოძრაობის გლობალურ გამოცდილებას ეყრდნობა.  

დამატებითი ინფორმაცია

პრესრელიზი