საქართველოში ჭკვიანი სოფლების განვითარების მიზნით საგრანტო კონკურსი გამოცხადდა

ევროკავშირმა და გაეროს განვითარების პროგრამამ (UNDP) საქართველოში „ჭკვიანი სოფლების“ განვითარების მიზნით გამოცხადებულ მეორე საგრანტო კონკურსზე განაცხადების მიღება დაიწყეს. 

 კონკურსის მიზანი  საქართველოს სასოფლო დასახლებებში პანდემიით გამოწვეული კრიზისის საპასუხო ღონისძიებების მხარდაჭერაა. ის  ორიენტირებული იქნება ისეთ პრაქტიკულ ზომებსა და ინოვაციებზე, რომლებიც სამუშაო ადგილების შექმნასა და შემოსავლების ზრდას ეკონომიკურად და სოციალურად მოწყვლადი ჯგუფების ჩართვის გზით შეუწყობს ხელს.

 დაფინანსებისთვის შერჩეული პროექტები უნდა განხორციელდეს მინიმუმ ერთი სოფლის ადმინისტრაციულ საზღვრებში შემდეგი მუნიციპალიტეტებიდან:  ქედა, ხულო, ბორჯომი, ახალქალაქი, თეთრიწყარო, ლაგოდეხი, დედოფლისწყარო და/ან ყაზბეგი.

განაცხადების შეტანა შეუძლიათ როგორც „ლიდერის“/თემის მიერ მართული ადგილობრივი განვითარების (CLLD) ინიციატივის მონაწილე ორგანიზაციებს (რომლებსაც უპირატესობა მიენიჭებათ), ასევე — არაწევრ ორგანიზაციებსაც.

საკონკურსო წინადადებების წარდგენის ბოლო ვადაა 2021 წლის 10 ივლისი.

დამატებითი ინფორმაცია

პრესრელიზი