მზია ამაღლობელის დაკავებიდან ერთი წლის თავზე ევროკავშირი კვლავ ითხოვს მის დაუყოვნებლივ გათავისუფლებას

მზია ამაღლობელის დაკავებიდან ერთი წლის თავზე ევროკავშირის წარმომადგენლობა საქართველოში კვლავ მოუწოდებს ქვეყნის ხელისუფლებას, დაუყოვნებლივ გაათავისუფლოს დაპატიმრებული ჟურნალისტი.

ამასთან, ევროკავშირის წარმომადგენლობა 2025 წლის 6 აგვისტოს 24 დიპლომატიური მისიის მიერ გაკეთებული იმ ერთობლივი განცხადების ერთგულიც რჩება, სადაც დაგმობილია „არაპროპორციული და პოლიტიზებული“ განაჩენი, რომლითაც მზია ამაღლობელს ორწლიანი პატიმრობა მიესაჯა. განცხადების ხელის მომწერნი, რომელთა რიცხვშიც არიან ევროკავშირის წარმომადგენლობა საქართველოში და ევროკავშირის წევრი სახელმწიფოების დიპლომატიური წარმომადგენლობები, სოლიდარობას უცხადებენ მზია ამაღლობელს და მოითხოვენ მის დაუყოვნებლივ გათავისუფლებას.

„მზია ამაღლობელის საქმე დამატებით დაამძიმა მისმა გაჭიანურებულმა წინასწარმა პატიმრობამ, როდესაც მისი ჯანმრთელობის მდგომარეობა და განსაკუთრებით მისი მხედველობა მნიშვნელოვნად გაუარესდა“, ნათქვამია განცხადებაში, „მზია ამაღლობელის საქმე და ‘ბათუმელებსა’ და ‘ნეტგაზეთზე’ განხორციელებული ზეწოლა საქართველოში ჟურნალისტების მზარდი დაშინების, დაუსჯელი ძალადობისა და სამართლებრივი დევნის მაგალითია, მედიის თავისუფლებისა და გამოხატვის თავისუფლების დაცვის კუთხით საქართველოს მიერ აღებული საერთაშორისო ვალდებულებების აშკარა დარღვევის გზით“. 

ევროკავშირის გარდა, განცხადებას ასევე ხელს აწერენ ავსტრიის, ბელგიის, კანადის, ჩეხეთის, დანიის, ესტონეთის, ფინეთის, საფრანგეთის, გერმანიის, ისლანდიის, ირლანდიის, იტალიის, ლატვიის, ლიეტუვის, ლუქსემბურგის, ნიდერლანდების, ნორვეგიის, პოლონეთის, რუმინეთის, ესპანეთის, შვედეთის, უკრაინისა და დიდი ბრიტანეთის დიპლომატიური წარმომადგენლები. 

დამატებითი ინფორმაცია

პრესრელიზი