მიშელი: ევროკავშირი ყველაფერს გააკეთებს ქართველი ხალხის ევროპული მისწრაფებების მხარდასაჭერად

საქართველოს პარლამენტის მიერ უცხოური გავლენის გამჭვირვალობის შესახებ კანონის საბოლოო მიღება არის „უკან გადადგმული ნაბიჯი და აშორებს საქართველოს ევროკავშირის გზას“, — დაწერა ევროპარლამენტის პრეზიდენტმა, შარლ მიშელმა X-ზე (ყოფილი Twitter) 28 მაისს.

მან შეხსენების სახით აღნიშნა, რომ ევროპულმა საბჭომ 2023 წლის დეკემბერში  საქართველოსთვის კანდიდატის სტატუსის მინიჭების გადაწყვეტილება მიიღო „იმ პირობით, რომ საქართველო გადადგამდა შესაბამის ნაბიჯებს და  გაატარებდა აუცილებელ დემოკრატიულ რეფორმებს“. 

„ქართველმა ხალხმა მკაფიოდ აირჩია მომავალი ევროკავშირში და ჩვენ ყველაფერს გავაკეთებთ იმისათვის, რომ მხარი დავუჭიროთ მათ მისწრაფებებს“, — წერს მიშელი X-ზე, — „ამ მიზნით, მომავალი ევროპული საბჭოს დღის წესრიგს საქართველოს საკითხს დავამატებ“.

საქართველოში მიმდინარე მოვლენებს X-ზე ასევე გამოეხმაურა ევროკომისიის პრეზიდენტი, ურსულა ფონ დერ ლაიენი: „ქართველი ხალხის უდიდეს უმრავლესობას სურს ევროკავშირში გაწევრიანება.  მაგრამ უცხოური გავლენის გამჭვირვალობის შესახებ კანონი ეწინააღმდეგება ევროკავშირის ძირითად პრინციპებსა და ფასეულობებს, რაც უარყოფითად აისახება საქართველოს ევროკავშირისკენ მიმავალ გზაზე“.

ფონ დერ ლაიენის პოსტი ასევე ეხმიანება  ევროკავშირის უმაღლესი წარმომადგენლის, ჯოზეფ ბორელისა და ევროკომისიის საერთო განცხადებას, რომლის თანახმადაც, ევროკავშირი ახლა „განიხილავს ყველა ვარიანტს“, საქართველოს მთავრობას კი მოუწოდებს, დაუბრუნდეს ევროპულ მისწრაფებებს.

დამატებითი ინფორმაცია

შარლ მიშელის პოსტი X-ზე

ურსულა ფონ დერ ლაიენის პოსტი X-ზე