ჯოზეფ ბორელი საქართველოში ევროკავშირის სადამკვირვებლო მისიას ესტუმრა და ქვეყანაში მისი 15-წლიანი ყოფნის მნიშვნელობას გაუსვა ხაზი

8 სექტემბერს, საქართველოში ვიზიტის დროს, ევროკავშირის უმაღლესი წარმომადგენელი ჯოზეფ ბორელი საქართველოში ევროკავშირის სადამკვირვებლო მისიის (EUMM) დამკვირვებლებს შეხვდა და ქვეყანაში მისიის ყოფნის 15 წლისთავი აღნიშნა.

„გასული 15 წლის განმავლობაში ქვეყანაში ევროკავშირის სადამკვირვებლო მისიის ყოფნა ურყევად ადასტურებს ევროკავშირის მხრიდან მშვიდობისა და უსაფრთხოების გრძელვადიან მხარდაჭერას საქართველოსა და მთელ რეგიონში. 15 წლის განმავლობაში ევროკავშირის სადამკვირვებლო მისია გადამწყვეტ როლს ასრულებდა რეგიონში სტაბილურობის უზრუნველყოფასა და დაძაბულობის შემცირებაში“, — აღნიშნა ბორელმა, — „ევროკავშირი კვლავაც ურყევად უჭერს მხარს რეგიონულ მშვიდობას და სტაბილურობას სამხრეთ კავკასიაში“.

უმაღლესმა წარმომადგენელმა სამხრეთ ოსეთის ადმინისტრაციულ სასაზღვრო ხაზზე, სოფელ ხურვალეთის მახლობლად ევროკავშირის სადამკვირვებლო მისიის პატრულირებაში მიიღო მონაწილეობა. ხურვალეთში ბორელი პირადად გაეცნო იმას, თუ რამდენად ზღუდავს მოსახლეობის გადაადგილების თავისუფლებას „ბორდერიზაციის“ სტრუქტურები — მათ შორის ღობეები, მავთულხლართები და სათვალთვალო კოშკები. მისიის დამკვირვებლებმა განმარტეს, რა გამოწვევებს ქმნის ის გარემოება, რომ ყოველი თვის პირველი ოცი დღის განმავლობაში სამხრეთ ოსეთთან ადმინისტრაციული სასაზღვრო ხაზის გასწვრივ მდებარე გადაკვეთის პუნქტები იხურება. 

„მე მქონდა შესაძლებლობა, მენახა ადმინისტრაციული სასაზღვრო ხაზი და ადგილებზე გავსაუბრებოდი დაზარალებულ ადამიანებს. ეს კონფლიქტი ყველაზე ძვირად სწორედ ამ ადამიანებს უჯდებათ“, — დაწერა ჯოზეფ ბორელმა X-ზე (ყოფილი Twitter).

დამატებითი ინფორმაცია

პრესრელიზი