IOM საქართველოს საზღვრის რისკების ანალიზის უნარებზე ევროკავშირის მხარდაჭერილ ტრენინგებს ატარებს

მიგრაციის საერთაშორისო ორგანიზაციამ (IOM) ევროკავშირის მიერ დაფინანსებული „ევროკავშირის უსაფრთხოების, ანგარიშვალდებულებისა და საქართველოში დანაშაულის წინააღმდეგ ბრძოლის“ (SAFE) პროგრამის ფარგლებში 2024 წლის თებერვალსა და მარტში ექვსი ტრენინგი ჩაატარა.

პროექტი, „საზღვრის ინტეგრირებული მართვის მხარდაჭერა საქართველოში“, მიზნად საქართველოს შინაგან საქმეთა სამინისტროს (შსს) რეგიონულ დანაყოფებში  საზღვრის რისკების ანალიზის უნარების გაუმჯობესებას ისახავს.

ინიციატივა ხელს უწყობს საზღვრის რისკის ანალიზის საერთო სტანდარტების დანერგვას შსს-ის ისეთ დანაყოფებში, როგორებიცაა სასაზღვრო პოლიციის, საპატრულო პოლიციის, მიგრაციისა და საინფორმაციო-ანალიტიკური დეპარტამენტები.

ბათუმში, ახალციხესა და თელავში ჩატარებული ტრენინგები შსს-ის ტაქტიკურ და ოპერაციულ დონეზე მომუშავე თანამშრომლების კომპეტენციების ამაღლებას ისახავდა მიზნად.  კურსის მონაწილეებმა შეისწავლეს სასაზღვრო უსაფრთხოებასთან დაკავშირებული მონაცემების მოპოვების, დამუშავების, ანალიზისა და შესაბამისი ანალიტიკური პროდუქტების მომზადების საკითხები.

ტრენინგის დროს გამოყენებული მეთოდოლოგია, რომელიც შსს-მ ახლახან დაამტკიცა, ევროკავშირის საერთო ინტეგრირებული რისკის ანალიზის მოდელს (CIRAM) ეფუძნება.

პროექტის ბიუჯეტი 8.2 მილიონი ევროა და ის „ევროკავშირის უსაფრთხოების, ანგარიშვალდებულების და საქართველოში დანაშაულის წინააღმდეგ ბრძოლის“ (SAFE) პროგრამის ფარგლებში ხორციელდება. 2019 წლის დეკემბერში დაწყებული პროექტი მიზნად საქართველოს სასაზღვრო უწყებების სამართლებრივი, ინსტიტუციური და ოპერაციული შესაძლებლობების გაძლიერებას ისახავს, რაც საქართველოსა და მთელ რეგიონში უსაფრთხოების უზრუნველყოფას შეუწყობს ხელს. 

დამატებითი ინფორმაცია

პრესრელიზი