„ჰორიზონტი ევროპა“: ევროკავშირი EIC აქსელერატორის სააპლიკაციო პროცესს ამარტივებს 

6 ნოემბერს ევროკომისიამ ევროპული ინოვაციების საბჭოს (EIC) 2026 წლის სამუშაო პროგრამა შეიმუშავა, რის საფუძველზეც გარდამტეხ ინოვაციებსა და ღრმა ტექნოლოგიებზე მომუშავე კომპანიების მხარდასაჭერად 1.4 მილიარდი ევრო გამოიყო. 

პროგრამა გარკვეულ პროცედურებს აუმჯობესებს, რის შედეგადაც დაფინანსების პროცესი იქნება მეტად სწრაფი, მოქნილი და ინოვატორთა საჭიროებებზე უკეთ მორგებული.

მაგალითად, EIC აქსელერატორისთვის განაცხადების შეტანის პროცესი გამარტივდება: განაცხადის მოცულობა 50-იდან 20 გვერდამდე შემცირდება და შეფასების რაუნდი, რომელიც ადრე წელიწადში ორჯერ ეწყობოდა, ახლა ყოველ ორ თვეში ერთხელ გაიმართება. მეტად ეფექტიანი საინვესტიციო გადაწყვეტილებების მისაღებად, პროცესი ტექნოლოგიური მზადყოფნის შეფასებისას მეტად ცხად კრიტერიუმებს დაეყრდნობა. 

EIC აქსელერატორი, რომელიც ფინანსების გამცემი პროგრამაა, „ჰორიზონტი ევროპას“ ფარგლებში მუშაობს. ის მხარს უჭერს სტარტაპებსა და მცირე და საშუალო საწარმოებს, რომლებსაც აქვთ ინოვაციური, სტატუს-კვოს შემცვლელი პროდუქტი, მომსახურება ან ბიზნესმოდელი, რომელსაც შეუძლია ახალი ბაზრების შექმნა ან არსებულების გარდაქმნა ევროპაში ან თუნდაც მსოფლიოს მასშტაბით. 

EIC აქსელერატორი განაცხადებს იღებს იმ აპლიკანტებისგან, რომლებიც „ჰორიზონტი ევროპის“ პროგრამასთან ასოცირებულ ქვეყნებს წარმოადგენენ. ამ ქვეყნებს შორის არიან საქართველო, მოლდოვა, სომხეთი და უკრაინა.

ინიციატივა მხარს დაუჭერს ცალკეულ სტარტაპებს ან მცირე და საშუალო საწარმოებს (მათ შორის „სპინაუტებს“), საშუალო კაპიტალიზაციის მქონე მცირე კომპანიებს (499-მდე დასაქმებული) და ფიზიკურ ან იურიდიულ პირებს, რომლებსაც მცირე და საშუალო საწარმოს ან საშუალო კაპიტალიზაციის მქონე კომპანიის დაარსება სურთ.  

გამარტივებული სააპლიკაციო პროცესი ნიშნავს იმას, რომ კონკურსში მოკლე განაცხადის წარდგენა შესაძლებელია ნებისმიერ დროს და მას მიღებისთანავე დისტანციურად შეაფასებენ EIC-ის ექსპერტი შემფასებლები. თუ ისინი მოკლე აპლიკაციას მოიწონებენ, გამცხადებელს შეეძლება სრული განაცხადის წარდგენა 2026 წლის რომელიმე ბოლო ვადისთვის: 

• 2026 წლის 7 იანვარი,
• 2026 წლის 4 მარტი,
• 2026 წლის 6 მაისი,
• 2026 წლის 8 ივლისი,
• 2026 წლის 2 სექტემბერი,
• 2026 წლის 4 ოქტომბერი. 

განაცხადები მიიღება დაფინანსებისა და ტენდერების პორტალზე, რომელზე მოხვედრაც EIC-ის ვებსაიტიდანაც შეიძლება.

დამატებითი ინფორმაცია

პრესრელიზი

ევროპული ინოვაციების საბჭოს (EIC) სამუშაო პროგრამა