ევროპის რეკონსტრუქციისა და განვითარების ბანკს თურქეთსა და კავკასიაში ახალი მმართველი დირექტორი ჰყავს

ევროპის რეკონსტრუქციისა და განვითარების ბანკმა (EBRD) ელიზაბეტა ფალჩეტი თურქეთსა და კავკასიის რეგიონში ახალ მმართველ დირექტორად დანიშნა. ის ახალი მოვალეობების შესრულებას 1 აგვისტოს შეუდგება.

ელიზაბეტა ფალჩეტის ამჟამად პოლონეთსა და ბალტიის ქვეყნებში რეგიონული ხელმძღვანელის პოსტი უკავია. თურქეთში ახლანდელი მმართველი დირექტორი კი არვიდ ტიურკნერია, რომელიც ახლახან დაინიშნა ბანკის მმართველ დირექტორად უკრაინასა და მოლდოვაში და თავისი მოვალეობების შესრულებას ივნისის დასაწყისში შეუდგა. 

EBRD-ის ვიცე-პრეზიდენტმა საბანკო საკითხებში, მატეო პატრონემ მისასალმებელ სიტყვაში განაცხადა: „ელიზაბეტა თავის ახალ პოსტს ლიდერის და ადამიანური რესურსების მართვის საგულისხმო გამოცდილებით გაამდიდრებს. გარდა ამისა, მას EBRD-ის სტრატეგიების შემუშავებისა და განხორციელების შედეგად ბიზნესის წარმოების და შედეგების მიღწევის დადასტურებული გამოცდილებაც მოეპოვება“. მან დასძინა, რომ ფალჩეტი გააუმჯობესებს ბანკის საქმიანობას თურქეთში და „ძალზე მნიშვნელოვან“ კავკასიის რეგიონში.

„ჩვენი ყოველწლიური შეხვედრა წელს ერევანში ჩატარდა და ამ შეხვედრამ კიდევ ერთხელ დაადასტურა კავკასიის პოტენციალი”, — განაცხადა ელიზაბეტა ფალჩეტიმ, — „ჩვენ გავაგრძელებთ მუშაობას სომხეთის, აზერბაიჯანისა და საქართველოს ეკონომიკის განვითარებისათვის კერძო სექტორის მხარდაჭერით და ძირითადი ინფრასტრუქტურის განვითარებით, რაც ინვესტიციებითა და რეფორმების საკითხებზე პოლიტიკური დიალოგის გზით  მოხდება“.

დღეისათვის ბანკის საერთო ინვესტიციების მოცულობა საქართველოში 5.3 მილიარდ ევროს შეადგენს, აზერბაიჯანში — 3.7 მილიარდ ევროს, ხოლო  სომხეთში — 2.4 მილიარდ ევროს.  

დამატებითი ინფორმაცია

პრესრელიზი