ევროკომისია: „საქართველოს კანდიდატი ქვეყნის მხოლოდ სახელი აქვს“
„საქართველოს ხელისუფლებამ უნდა აჩვენოს კურსის შეცვლის და ქვეყნის ევროკავშირში გაწევრიანების გზაზე დაბრუნების მტკიცე ნება“, ნათქვამია ევროკომისიის მიერ 4 ნოემბერს მიღებულ ყოველწლიურ გაფართოების პაკეტში.
2024 წლის ივნისსა და ოქტომბერში ევროპულმა საბჭომ დაასკვნა, რომ საქართველოს ხელისუფლების მოქმედების კურსმა შეაფერხა ქვეყნის სვლა ევროკავშირისკენ და დე ფაქტო შეაჩერა გაწევრიანების პროცესი. 2024 წლის დეკემბერში ევროპულმა საბჭომ სინანული გამოთქვა საქართველოს მთავრობის გადაწყვეტილებაზე, 2028 წლამდე შეაჩეროს ქვეყნის ევროკავშირში გაწევრიანების პროცესი. მას მერე სიტუაცია კიდევ უფრო და მნიშვნელოვნად გაუარესდა, აცხადებს ევროკომისია.
„საქართველოში აღინიშნება სერიოზული დემოკრატიული უკუსვლა, კანონის უზენაესობას სწრაფი ტემპებით ეცლება საფუძველი და ფუნდამენტური უფლებები მკვეთრად იზღუდება“, ვკითხულობთ პაკეტში, „ხელისუფლების სისტემური და სისტემატური რეპრესიული ქმედებები, მათ შორის კანონმდებლობის მიღება, რომელიც ზღუდავს სამოქალაქო სივრცეს, ფუნდამენტურ უფლებებს და დამოუკიდებელი მედიის საქმიანობას და მიზანში იღებს LGBTIQ თემის წევრებს, სამართალდამცავი ორგანოების მხრიდან ძალის გადამეტების სრული დაუსჯელობა და ევროკავშირისადმი მტრული რიტორიკა, მკვეთრად ეწინააღმდეგება ევროკავშირის ღირებულებებსა და იმ სტანდარტებს, რომლებიც ევროკავშირის კანდიდატ ქვეყანას შეეფერება“.
ამას გარდა, მნიშვნელოვანი უკუსვლა შეინიშნება იმ ცხრა ნაბიჯის შესრულების პროცესში, რომელიც ევროკომისიამ კანდიდატის სტატუსისთვის რეკომენდაციად გასცა, რაც ქვეყანას კიდევ უფრო აშორებს ევროკავშირისკენ მიმავალ გზას, აღნიშნა ევროკომისიამ. ინსტიტუტები, რომელთა მიზანიც კანონის უზენაესობის უზრუნველყოფა უნდა იყოს, პარტიული მიზნებისთვის გამოიყენება, რაც მათ სამართლიან მუშაობას ძირს უთხრის. ხელისუფლებას არ გადაუდგამს არავითარი ნაბიჯი მოქმედების კურსის შესაცვლელად და ქვეყნის ევროკავშირის გზაზე დასაბრუნებლად.
ოპოზიციის წამყვანი ფიგურების დაჭერა, რასაც ერთვის მმართველი პარტიის განცხადება, რომ მას განზრახული აქვს, აკრძალოს გარკვეული ოპოზიციური პარტიები და მათთან დაკავშირებული პირები, პირდაპირ უტევს დემოკრატიულ პლურალიზმს.
ევროკომისია ასკვნის, რომ საქართველოს „კანდიდატი ქვეყნის მხოლოდ სახელი აქვს“.
დამატებითი ინფორმაცია
2025 წლის ანგარიში საქართველოზე
ევროკავშირი და საქართველოს – ინფოგრაფიკა
2025 წლის კომუნიკე ევროკავშირის გაფართოების პოლიტიკაზე
ყველაზე წაკითხული
თემაზე
EBRD-მა „ავერსი ფარმას“ 10 მილიონი ევროს ოდენობის სესხი გამოუყო
ევროკავშირისა და გაეროს მხარდაჭერით საქართველო ჰაერის ხარისხის მონიტორინგის ქსელს აფართოებს
ევროკავშირი და მისი წევრი სახელმწიფოები საქართველოს დამოუკიდებლობის დღეს ულოცავენ
ევროპის პოლიტიკური საზოგადოება ერევანში: „ეს სამიტი სამუდამოდ დარჩება მეხსიერებაში, როგორც მშვიდობის სამიტი კავკასიაში“, ანტონიუ კოშტა
ევროკავშირი აქვეყნებს განმარტებით დოკუმენტს შესვლა-გასვლის სისტემასა (EES) და ევროპაში მოგზაურობის შესახებ ინფორმაციისა და ავტორიზაციის სისტემას (ETIAS) შორის არსებული ძირითადი განსხვავებების შესახებ: რა უნდა იცოდნენ მგზავრებმა
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
