ევროკომისარი ვარჰეი: „საქართველოს პრემიერ-მინისტრთან ჩემი სატელეფონო საუბრის ნაწილი კონტექსტიდანაა ამოღებული“

ევროკომისარმა სამეზობლო პოლიტიკისა და გაფართოებაზე მოლაპარაკებების საკითხებში, ოლივერ ვარჰეიმ წუხილი გამოთქვა იმის გამო, რომ საქართველოს პრემიერ-მინისტრ ირაკლი კობახიძესთან მისი სატელეფონო საუბრის გარკვეული ნაწილი „კონტექსტიდან იყო ამოღებული“.

„ვინაიდან სრულად ვაცნობიერებ ქართული საზოგადოების ძალიან ძლიერ პროევროპულ განწყობას, ჩემი სატელეფონო საუბრისას საჭიროდ ჩავთვალე, პრემიერის ყურადღება მიმეპყრო იმაზე, რომ ამ კანონის მიღებით არ გამწვავებულიყო ისედაც მყიფე ვითარება, რამაც შეიძლება გამოიწვიოს შემდგომი პოლარიზაცია და შესაძლო უკონტროლო სიტუაციები თბილისის ქუჩებში,“ — განაცხადა ვარჰეიმ, — „ამასთან დაკავშირებით, სლოვაკეთის ბოლო ტრაგიკული მოვლენა მოყვანილი იქნა როგორც  მაგალითი და იმაზე მითითება, თუ სადამდე შეიძლება მიგვიყვანოს პოლარიზაციის ასეთმა მაღალმა დონემ საზოგადოებაში, თუნდაც ევროპაში“.

მისივე თქმით, საქართველოს დღევანდელ პოლიტიკურ ვითარებაში ის სწევს დიდ ძალისხმევას,  რომ საქართველოს პოლიტიკურ ხელმძღვანელობას გადაათქმევინოს უცხოური გავლენის გამჭვირვალობის შესახებ კანონის მიღება, „რომელსაც შეუძლია, ძირი გამოუთხაროს საქართველოს ევროკავშირისკენ მიმავალ გზას“.

„მე კვლავ მოვუწოდებ საქართველოს ხელისუფლებას, არ მიიღოს კანონი”, — დასძინა ევროკომისარმა, — “ამას გთხოვთ, ასევე, როგორც საქართველოს კარგად ნაცნობი და აქამდე პატივცემული მეგობარი“.

„მე ვაგრძელებ მხარდაჭერას ქართველების, რომლებიც ევროპული მომავლისთვის იღვწიან“.

დამატებითი ინფორმაცია

პრესრელიზი