ევროკავშირმა საქართველოს საგანგებო სიტუაციების მართვის სამსახურს სამაშველო აღჭურვილობა გადასცა

დეკემბრის დასაწყისში საქართველოში ევროკავშირის წარმომადგენლობამ საქართველოს შინაგან საქმეთა სამინისტროს საგანგებო სიტუაციების მართვის სამსახურს სამაშველო ოპერაციებისთვის საჭირო აღჭურვილობა გადასცა. 

კერძოდ, უწყებამ მიიღო მაღალი გამავლობის შვიდი მანქანა, სამი ყველგანმავალი, სამი დრონი, თხილამურებისა და სათხილამურო აღჭურვილობის 40 კომპლექტი და სამძებრო აღჭურვილობის 12 ერთეული. 

„ვიმედოვნებთ, რომ გადაცემული აღჭურვილობა და მას დართული ტექნიკური დახმარება გააუმჯობესებს საგანგებო სიტუაციების მართვის სამსახურის რეაგირებას კრიზისულ სიტუაციებში და მისცემს მას შესაძლებლობას, უკეთ დაიცვას საქართველოში მცხოვრები ადამიანების ჯანმრთელობა და სიცოცხლე“, — განაცხადა ევროკავშირის წარმომადგენლობის პროგრამების მიმართულების ხელმძღვანელის მოვალეობის შემსრულებელმა, კატალინ გერმანმა.

ევროკავშირი პროექტის, „ტექნიკური შესაძლებლობების განვითარების ხელშეწყობა ადამიანის უსაფრთხოების უზრუნველსაყოფად”, ფარგლებში საგანგებო სიტუაციების მართვის სამსახურს 2.5 მილიონი აშშ დოლარის ღირებულების მხარდაჭერას უწევს. გაეროს მომსახურების ოფისის (UNOPS) მიერ მართული ეს პროექტი პროგრამის, „ევროკავშირის უსაფრთხოების, ანგარიშვალდებულებისა და საქართველოში დანაშაულის წინააღმდეგ ბრძოლა“ (SAFE), ფარგლებში ხორციელდება.

მომავალი წლიდან ევროკავშირი უწყებას დამატებით მხარდაჭერას გაუწევს. კერძოდ, განვითარდება ინციდენტების მართვის სისტემები, ასევე შემუშავდება სტანდარტული საოპერაციო პროცედურები და ხანძარსაწინააღმდეგო ევროპული სტანდარტები.

დამატებითი ინფორმაცია

პრესრელიზი