ევროკავშირმა „ევრატომის“ კვლევისა და ტრენინგის პროგრამა დაამტკიცა

12 მაისს ევროკავშირის საბჭომ მიიღო რეგულაცია, რომელიც „ევრატომის“ 2021-2025 წლების სამეცნიერო კვლევისა და ტრენინგის პროგრამას ამტკიცებს. პროგრამის ბიუჯეტი 1.38 მილიარდ ევროს აღემატება. ის ევროპული ჩარჩოს მეორე პროგრამის, „ჰორიზონტი ევროპის“ საქმიანობას გააფართოებს.

ახლადმიღებული პროგრამის მიზანია, მხარი დაუჭიროს ბირთვული სინთეზის და დაშლის კვლევებსა და ევროკავშირის კიბოს დაძლევის გეგმას. ის ასევე ბირთვული ფიზიკის სფეროში ევროპის ექსპერტული ცოდნის გაღრმავებასა და კომპეტენციების გაუმჯობესებას შეუწყობს ხელს. პროგრამა ევროპული კვლევის იმ სტრატეგიული გეგმის განხორციელებასაც დაეხმარება, რომელიც ენერგიის თერმობირთვული სინთეზის გზით მიღებას ისახავს  მიზნად. ეს მეთოდი დაბალნახშირბადიანი ელექტროენერგიის ფართომასშტაბიან და გრძელვადიან წარმოებას გახდის შესაძლებელს. 

ამას გარდა, პროგრამა ინიციატივის, მარი სკლოდოვსკა–კიურის აქტივობები, ფარგლებში შექმნის ახალ შესაძლებლობებს ბირთვული ფიზიკის ექსპერტთა მობილობის, განათლების დონისა და პროფესიული უნარ–ჩვევების გასაუმჯობესებლად.

„ევრატომის“ ერთ–ერთი მიმდინარე პროექტია HARMONIC („გულის რენტგენოსკოპიის და თანამედროვე რადიოთერაპიის გავლენა ბავშვთა ჯანმრთელობაზე“). 2019 წელს დაწყებული პროექტისთვის „ევრატომის“ მიერ გაწეულმა მხარდაჭერამ 7 მილიონი ევრო შეადგინა. პროექტს ხელმძღვანელობს 24 პარტნიორი ევროკავშირის 11 წევრი ქვეყნიდან, უკრაინიდან და შვეიცარიიდან. ამ კვლევის ფარგლებში ფართოდ გამოიყენება რადიაციული დიაგნოსტიკური და სამკურნალო მეთოდები, რამაც კიბოს მქონე პედიატრიულ პაციენტებში  ადრეული დიაგნოსტიკის მაჩვენებლების გაუმჯობესებასა და სიცოცხლის გადარჩენას შეუწყო ხელი.

დამატებითი ინფორმაცია

პრესრელიზი

ევრატომის კვლევისა და ტრენინგის პროგრამა

ჰორიზონტი ევროპა