ევროკავშირის საგარეო საქმეთა მინისტრები უკრაინისთვის დამატებით შეიარაღებისა და სამხედრო აღჭურვილობის გამოყოფაზე შეთანხმდნენ 

ევროკავშირის საგარეო საქმეთა მინისტრები უკრაინისთვის დამატებით შეიარაღებისა და სამხედრო აღჭურვილობის გამოყოფაზე შეთანხმდნენ 

მარტი 23, 2022

22 მარტს ბრიუსელში გამართულ შეხვედრაზე ევროკავშირის საგარეო საქმეთა მინისტრებმა ახალ პოლიტიკურ შეთანხმებას მიაღწიეს. მის თანახმად, უკრაინას დამატებით 500 მილიონი ევროს ღირებულების შეიარაღება და სამხედრო აღჭურვილობა გამოეყოფა.

ევროკავშირის უმაღლესმა წარმომადგენელმა, ჯოზეფ ბორელმა განაცხადა, რომ ევროკავშირის ყველა სახელმწიფო კვლავაც „ერთსულოვნად არის გაერთიანებული უკრაინის მხარდასაჭერად“. ეს მხარდაჭერა საერთაშორისო არენაზე დიპლომატიურ თანადგომასა და ფინანსურ, ჰუმანიტარულ თუ უკრაინის სამხედრო ძალების დახმარებას გულისხმობს. 

ბორელმა ასევე აღნიშნა, რომ ევროკავშირი „გააგრძელებს რუსეთის იზოლირებას და ომის დანაშაულებისა და საერთაშორისო ჰუმანიტარული კანონმდებლობის უხეში დარღვევებისთვის მისთვის პასუხის მოთხოვნას“.

გარდა ამისა, თავდაცვის და საგარეო საქმეთა მინისტრების ერთობლივ შეხვედრაზე ევროპულმა საბჭომ ევროკავშირის უსაფრთხოების და თავდაცვის პოლიტიკის გასაძლიერებლად სტრატეგიული კომპასი დაამტკიცა. 

ევროკავშირის უმაღლესმა წარმომადგენელმა, ჯოზეფ ბორელმა აღნიშნა, რომ ამ დოკუმენტის მიღება „ერთიანობის და სიმტკიცის მძლავრ სიგნალს გზავნის“. თუმცა მან დასძინა, რომ ეს არ ყოფილა უკრაინაში მიმდინარე ომზე პასუხი. „ჩვენ მუშაობა ორი წლის წინ დავიწყეთ, მაგრამ ერთობ დროულია, რომ სტრატეგიული კომპასი სწორედ ახლა დავამტკიცეთ — მაშინ, როდესაც, ვგონებ, ევროპის ყველა მოქალაქეს შეუძლია გაიგოს იმ დოკუმენტის მიზანი, რომელიც ევროკავშირის, როგორც უსაფრთხოების უზრუნველმყოფელის, გაძლიერებას ემსახურება“.

ბორელის განცხადებით, დღეს ევროკავშირის ყველა წევრი სახელმწიფოს სამხედრო დანახარჯები ჯამში დაახლოებით 200 მილიარდ ევროს უტოლდება. ეს თითქმის ოთხჯერ აღემატება რუსეთს სამხედრო დანახარჯებს. თუმცა, მისი თქმით, თავდაცვასა და უსაფრთხოებაზე ევროკავშირი მთლიანი შიდა პროდუქტის 1.5%-ზე მეტს უნდა ხარჯავდეს: “ჩვენ მეტი უნდა დავხარჯოთ. მაგრამ უნდა დავხარჯოთ უკეთ. უკეთ დახარჯვა დუბლირების და ხარვეზების თავიდან აცილებას ნიშნავს“. მან ასევე აღნიშნა, რომ ევროკავშირს არ სურს ევროპული ჯარის შექმნა — ჯარები ევროკავშირის წევრ სახელმწიფოებს ჰყავთ.

ბორელმა დასძინა, რომ საბჭო ევროკავშირის სწრაფი რეაგირების შენაერთის შექმნაზე შეთანხმდა. ეს ევროკავშირს საშუალებას მისცემს, კრიზისებზე საპასუხოდ გაწვრთნილი და აღჭურვილი 5,000 სამხედროს მობილიზაცია მოახდინოს. „ჩვენ გავაძლიერებთ ჩვენს მართვისა და კონტროლის პოტენციალს და ერთად ჩავატარებთ საველე სწავლებებს. მსგავსი რამ აქამდე არასოდეს მომხდარა“, — აღნიშნა ბორელმა.

დამატებითი ინფორმაცია

პრესრელიზი

ჯოზეფ ბორელის შენიშვნები




გაინტერესებთ უკანასკნელი ცნობები და შესაძლებლობები?

ამ ვებსაიტს მართავს ევროკავშირის მიერ დაფინანსებული აღმოსავლეთ სამეზობლოს რეგიონული საკომუნიკაციო პროგრამა („EU NEIGHBOURS east“) 2020-2024. ეს პროგრამა ავსებს და მხარს უჭერს ევროკავშირის წარმომადგენლობების კომუნიკაციას აღმოსავლეთ პარტნიორობის ქვეყნებში; ის მოქმედებს სამეზობლო პოლიტიკის და გაფართოებაზე მოლაპარაკებების საკითხებში ევროკომისიის გენერალური დირექტორატის და ევროპული საგარეო ქმედებათა სამსახურის ხელმძღვანელობით. პროგრამას ახორციელებს კომპანიის B&S ევროპის კონსორციუმი.

ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით.
© European Union,