ევროკავშირის სადამკვირვებლო მისია ზუგდიდში ახალ რეგიონულ ოფისში გადავიდა

6 სექტემბერს ევროკავშირის სადამკვირვებლო მისია (EUMM)  ზუგდიდში ახალ რეგიონულ ოფისში ოფიციალურად გადავიდა. ეს არის „მნიშვნელოვანი ეტაპი“ მისიის მიმდინარე ძალისხმევაში, შეინარჩუნოს თავისი ოპერაციული შესაძლებლობები აფხაზეთთან ადმინისტრაციული სასაზღვრო ხაზის გასწვრივ, ნათქვამია EUMM-ის პრესრელიზში.

ცოტნე დადიანის 25-ში მდებარე ახალი რეგიონული ოფისი, რომელმაც თავისუფლების ქუჩის 8 ნომერში მდებარე ოფისი ჩაანაცვლა, მისიის მზარდი საჭიროებების დაკმაყოფილებაზეა მორგებული. ის აღჭურვილია თანამედროვე მოწყობილობით, მოწინავე საკომუნიკაციო ხელსაწყოებით და უსაფრთხოების გაძლიერებული ზომებით.

„ეს ნაბიჯი უფრო მეტი მნიშვნელობისაა, ვიდრე შენობის ჩანაცვლება. ეს ახალი შენობა საქართველოში მშვიდობისა და სტაბილურობისადმი ჩვენი გრძელვადიანი თავდადების სიმბოლოა. კერძოდ, ეს ასახავს ჩვენს მუდმივ ერთგულებას, მხარი დავუჭიროთ აფხაზეთთან ადმინისტრაციული სასაზღვრო ხაზის გასწვრივ მცხოვრებ კონფლიქტით დაზარალებულ თემებს“, – გახსნის ცერემონიაზე განაცხადა მისიის ხელმძღვანელმა, ბეტინა პატრიცია ბუგანიმ. 

წინა რეგიონულ ოფისს, რომელიც 2008 წლის დეკემბრიდან თითქმის 16 წელი ფუნქციონირებდა, უდიდესი მნიშვნელობა ჰქონდა ევროკავშირის სადამკვირვებლო მისიის ოპერაციებისთვის. ამ პერიოდის განმავლობაში მისიამ საქართველოში სტაბილურობის ხელშესაწყობად მნიშვნელოვანი როლი შეასრულა მუდმივი მონიტორინგის, ნდობის აღდგენის ძალისხმევისა და მიუკერძოებელი ანგარიშგების მეშვეობით. 

დამატებითი ინფორმაცია

პრესრელიზი