ევროკავშირის ნარკოტიკების სააგენტომ ნარკოტიკებთან დაკავშირებული ახალი სამოქალაქო საზოგადოების პლატფორმა აამოქმედა

ევროკავშირის ნარკოტიკების სააგენტომ (EUDA) აამოქმედა ნარკოტიკებთან დაკავშირებული ახალი სამოქალაქო საზოგადოების პლატფორმა, რომელიც ევროპაში სამოქალაქო საზოგადოების ორგანიზაციებთან (CSO) თანამშრომლობის გასაძლიერებლად შექმნილი სპეციალური ონლაინ სივრცეა.

ახალი პლატფორმა ქმნის სტრუქტურირებულ ჩარჩოს EUDA-სა და სამოქალაქო საზოგადოების ორგანიზაციებს შორის ინფორმაციის გაცვლის, ცოდნის გაზიარებისა და კონსულტაციებისთვის. ის საშუალებას მისცემს ორგანიზაციებს გააზიარონ საკუთარი ექსპერტიზა, აწარმოონ დიალოგი სააგენტოსთან და მუდმივად იყვნენ ინფორმირებულები ნარკოტიკების და წამალდამოკიდებულების სფეროში არსებული საკვანძო მოვლენების შესახებ.

ევროკავშირის ნარკოტიკების სააგენტო თანამშრომლობს სომხეთთან, აზერბაიჯანთან, საქართველოსთან, მოლდოვასთან და უკრაინასთან.

პლატფორმა ღიაა სხვადასხვა სახის შესაბამისი ორგანიზაციებისთვის, მათ შორის არასამთავრობო, მოხალისეთა, არაკომერციული და საზოგადოებრივი ორგანიზაციებისთვის, ცხოვრებისეული გამოცდილების მქონე პირებისა და დაზარალებული საზოგადოებრივი ჯგუფების წარმომადგენლებისთვის.

„სამოქალაქო საზოგადოება სასიცოცხლოდ მნიშვნელოვან როლს ასრულებს იმის გააზრებაში, თუ როგორ მოქმედებს რეალურ ცხოვრებაში ნარკოტიკებისა და წამალდამოკიდებულების საკითხები ადამიანებსა და საზოგადოებრივ ჯგუფებზე“, – ნათქვამია EUDA-ს პრესრელიზში. „ადგილზე მიღებული გამოცდილებისა და დაზარალებულ მოსახლეობასთან პირდაპირი ჩართულობის გზით სამოქალაქო საზოგადოების ორგანიზაციები იღებენ აუცილებელ ინფორმაციას, რომლის დახმარებით ხდება პოლიტიკისა და რეაგირების ეფექტიანობის, ინკლუზიურობის, ისევე, როგორც ახალი საჭიროებების დაკმაყოფილების უზრუნველყოფა“.

გარდა ამისა, სააგენტომ აამოქმედა ახალი ვებგვერდი, რომელიც სპეციალურად არის შექმნილი, რათა ასახოს ევროკავშირის ნარკოტიკების სააგენტოს (EUDA) ურთიერთობა სამოქალაქო საზოგადოებასთან; ვებგვერდზე აღწერილია, თუ როგორ თანამშრომლობს სააგენტო სამოქალაქო საზოგადოების ორგანიზაციებთან, როგორია პლატფორმაზე გაწევრიანების კრიტერიუმები და რეგისტრაციის წესები.

დამატებითი ინფორმაცია

პრესრელიზი