ევროკავშირის კანდიდატი ქვეყნები ევროპის ეკონომიკური და სოციალური კომიტეტის საქმიანობაში ერთვებიან

15 თებერვალს ევროპის ეკონომიკურმა და სოციალურმა კომიტეტმა (EESC) ოფიციალურად დაიწყო ახალი ინიციატივა, რომლის მიზანიც ევროკავშირის კანდიდატი ქვეყნების, მათ შორის საქართველოს, სამოქალაქო საზოგადოების წარმომადგენლების საკუთარ საქმიანობაში ჩართვაა. 

კომიტეტის მუშაობაში მონაწილეობის მისაღებად შეირჩა სამოქალაქო საზოგადოების 131 ექსპერტი, რომლებიც „გაფართოების კანდიდატი წევრები“ (ECMs) გახდნენ. შედეგად, EESC იქცა ევროკავშირის პირველ ინსტიტუტად, რომელმაც თავისი კარი კანდიდატ ქვეყნებს გაუღო. უშუალოდ საქართველოდან ინიციატივაში 15 ექსპერტი ჩაერთო. შერჩეული წევრების სრული სიის ხილვა ამ ბმულზე გადასვლითაა შესაძლებელი. 

„ჩვენ ვეღარ ვამყოფებთ კანდიდატ ქვეყნებს მოსაცდელ ოთახში“, — განაცხადა EESC-ის პრეზიდენტმა, ოლივერ რიოპკემ, — „ჩვენ უნდა ახლავე დავიწყოთ ერთად მუშაობა — გავცვალოთ მოსაზრებები, გავაბათ კავშირები და ხელი შევუწყოთ ძლიერი და ჯანსაღი სამოქალაქო საზოგადოების განვითარებას. ამიტომ გადაწყვიტა EESC-მა, გაეღო თავისი კარი კანდიდატი ქვეყნებისთვის და ჩაერთო მათი წარმომადგენლები — ‘გაფართოების კანდიდატი წევრები’ — თავის საქმიანობაში“. მან ასევე დაურთო, რომ გაფართოება ერთ-ერთი „ყველაზე გადამწყვეტი და სტრატეგიული არჩევანია ევროკავშირისა და ამ კონტინენტის მომავლისათვის“. 

ECM საპილოტე პროექტია, რომელიც ევროკავშირის კანდიდატი ქვეყნების სამოქალაქო საზოგადოების ორგანიზაციების წარმომადგენლებს (დამსაქმებლებს, პროფკავშირელებს და სხვებს), საშუალებას აძლევს, ჩაერთონ EESC-ის საკონსულტაციო საქმიანობაში. ამგვარად, ისინი მონაწილეობას მიიღებენ EESC-ის შერჩეული მოსაზრებების მომზადების პროცესში და რელევანტურ სასწავლო ჯგუფებში, სექციურ შეხვედრებსა თუ EESC-ის პლენარულ სესიებში. ამასთან, ცალკეული მოსაზრების მომზადების პროცესში თითოეული კანდიდატი ქვეყნიდან მთლიანობაში სამი „გაფართოების კანდიდატი წევრი“ ჩაერთვება. 

დამატებითი ინფორმაცია

პრესრელიზი