ევროკავშირის ელჩი შიდა ქართლში ევროკავშირის ბენეფიციარ ფერმერებს ესტუმრა
ევროკავშირის ელჩი საქართველოში, პაველ ჰერჩინსკი შიდა ქართლის სოფლებს, ნადარბაზევსა და ქიწნისს ეწვია. ის იქ გაეროს სურსათისა და სოფლის მეურნეობის ორგანიზაციის (FAO) მიერ ევროკავშირის მხარდაჭერით განხორციელებული აქტივობებით მოსარგებლე ფერმერებს შეხვდა.
მარცვლეულისა და მერძევეობის სფეროში მომუშავე ადგილობრივმა ფერმერებმა და მეფუტკრეებმა ევროკავშირის ელჩს იმ მხარდაჭერის შესახებ უამბეს, რომელიც FAO-ს ინიციატივებით, კერძოდ, სურსათის უსაფრთხოების, სურსათის უვნებლობისა და ეკონომიკური განვითარების კუთხით მიიღეს. ეს ინიციატივები ევროკავშირისა და შვედეთის მიერ დაფინანსებული სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში ხორციელდება.
პროგრამის მიმდინარე ფაზა საქართველოში მარცვლეულის 200-ზე მეტ ფერმერს 1 500 ჰექტარ ფართობზე მარცვლეულის დათესვაში დაეხმარა. ფერმერებს გაუმარტივდათ ნულოვანი დამუშავების დანადგარებზე წვდომა, რის შედეგადაც დანახარჯების შემცირება შეძლეს. მათი ნაკვეთები, ამასთან, ეკოლოგიური რისკფაქტორებისა და კლიმატის ცვლილების მიმართ მეტად მედეგი გახდა. ამას გარდა, FAO-მ 2 000-ზე მეტ ფერმერს სურსათის უვნებლობის სტანდარტების თემაზე ტრენინგი ჩაუტარა.
„ბედნიერი ვარ, რომ ევროკავშირი, FAO-სთან ერთად, გარემოს დაცვისა და ქართველი ფერმერების შემოსავლის ზრდის მიზნით, საქართველოში სოფლის მეურნეობის მიდგომებისა და მეთოდების გაუმჯობესებას უწყობს ხელს“, — განაცხადა პაველ ჰერჩინსკიმ, — „ENPARD პროგრამას მნიშვნელოვანი წვლილი შეაქვს ქვეყნის სოფლის მეურნეობის განვითარებაში. მოხარულები ვართ, რომ ფერმერებთან, სურსათის ბიზნესოპერატორებთან და სახელმწიფო სტრუქტურებთან თანამშრომლობით ვმუშაობთ საქართველოში მეტად მდგრადი და ხარჯთეფექტიანი სოფლის მეურნეობის შესაქმნელად“.
ENPARD, რომლის მიზანიც სოფლად სიღარიბის შემცირებაა, 2013 წლიდან ხორციელდება. პროგრამამ საქმიანობა სოფლის მეურნეობის პოტენციალის განვითარების მხარდაჭერით დაიწყო. მისი მომდევნო მიზანი საქართველოს სოფლებში მცხოვრები მოსახლეობისთვის ეკონომიკური შესაძლებლობების შექმნა გახდა. 2021 წლიდან კი პროგრამა ქვეყანაში სურსათის უვნებლობის გაუმჯობესებაზეც მუშაობს. ამისთვის ის დამატებით ფინანსურ მხარდაჭერას შვედეთიდან იღებს, ხოლო სურსათის უვნებლობის კომპონენტის მთავარი განმახორციელებლები FAO და ჩეხეთის განვითარების სააგენტო არიან.
დამატებითი ინფორმაცია
ყველაზე წაკითხული
თემაზე
ირლანდია ევროკავშირის საბჭოს თავმჯდომარეობის მიღებისას უკრაინასა და სხვა კანდიდატ ქვეყნებს მხარდაჭერას აღუთქვამს
ევროკავშირისა და UNDP-ის ხელშეწყობით, საქართველოს მცირე და საშუალო ბიზნესი საერთაშორისო ბაზრებს ითვისებს
მამის დღე საქართველოში: UNFPA და ევროკავშირი ახალბედა მამებისთვის წიგნს წარმოადგენენ
ახალგაზრდა ევროპელი ელჩები ურთიერთობების, შთაგონების და ცვლილების ათწლეულს აღნიშნავენ
ევროკავშირის ინიციატივა, „საქართველო მწვანე მომავლისკენ“, 14 ივნისს თბილისში „შეკეთებისა და ხელახლა გამოყენების დღეს“ მართავს
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
