ევროკავშირის ელჩი საქართველოში საგარეო საქმეთა მინისტრის პირველ მოადგილეს გრანტების შესახებ კანონზე სასაუბროდ შეხვდა

12 თებერვალს საქართველოში ევროკავშირის ელჩი, პაველ ჰერჩინსკი, მისი თხოვნის საფუძველზე, საქართველოს საგარეო საქმეთა მინისტრის პირველმა მოადგილემ, გიორგი ზურაბიშვილმა მიიღო. 

შეხვედრის მიზანი გრანტების შესახებ კანონთან დაკავშირებულ საკანონმდებლო აქტებში ახლახან წარდგენილი ცვლილებების პაკეტის შესახებ ევროკავშირის სერიოზული შეშფოთების გამოთქმა იყო. პირველი მოსმენით მიღებული ცვლილებების არსებული სახით დამტკიცება „კიდევ ერთ მნიშვნელოვან საფრთხეს შეუქმნის საქართველოში სამოქალაქო სივრცესა და პოლიტიკურ საქმიანობაში მონაწილეობას“, ნათქვამია ევროკავშირის წარმომადგენლობის მიერ გავრცელებულ პრესრელიზში. 

ელჩმა აღნიშნა, რომ ამგვარი ზომები „შეუთავსებელია საქართველოს მიერ ევროკავშირი-საქართველოს ასოცირების შეთანხმებით ნაკისრ ვალდებულებებთან და ეწინააღმდეგება იმ ვალდებულებებს, რომლებიც საქართველომ, როგორც ევროკავშირის წევრობის კანდიდატმა ქვეყანამ, თავად აიღო“. 

ელჩმა ჰერჩინსკიმ აღნიშნა, რომ ცვლილებების დამტკიცებამ შეიძლება პირდაპირი და უარყოფითი გავლენა მოახდინოს საქართველოში მოქმედი დიპლომატიური მისიების მუშაობაზე, რაც ეწინააღმდეგება დიპლომატიური ურთიერთობების შესახებ ვენის კონვენციის დებულებებსა და პრინციპებს. 

თავის მხრივ, საქართველოს მხარემ ევროკავშირის სანქციების საკითხი წამოჭრა. პაველ ჰერჩინსკიმ ამის საპასუხოდ განაცხადა, რომ ევროკომისიამ რუსეთის წინააღმდეგ სანქციების მე-20 პაკეტი 6 თებერვალს წარადგინა და მას ამჟამად ევროკავშირის წევრი სახელმწიფოები განიხილავენ.  

ორივე მხარე მოვლენათა განვითარებასთან დაკავშირებით კონტაქტის შენარჩუნებაზე შეთანხმდა. 

დამატებითი ინფორმაცია

პრესრელიზი