ევროკავშირის ელჩი საქართველოში აჭარას ეწვია და თანამშრომლობის პროექტები მოინახულა

ევროკავშირის ელჩი საქართველოში, პაველ ჰერჩინსკი გასულ კვირას აჭარას ეწვია. ვიზიტის მიზანი ამ  რეგიონსა და ევროკავშირს შორის არსებული კავშირების გაძლიერება იყო. 

ვიზიტის მრავალფეროვანი დღის წესრიგი მთავრობის, სამოქალაქო საზოგადოების, ბიზნესისა თუ მედიის წარმომადგენლებთან და ახალგაზრდებთან შეხვედრებს მოიცავდა.

ამავე ვიზიტის ფარგლებში ელჩმა ჰერჩინსკიმ ქედაში ოფიციალურად გახსნა ევროკლუბი, რომელიც მნიშვნელოვან წვლილს შეიტანს რეგიონის განვითარებასა და განათლების სფეროში მეტი შესაძლებლობების გაჩენაში. ქედაში ევროკლუბის გახსნის ინიციატივა ეკუთვნოდა ახალგაზრდა ევროპელი ელჩების (YEAs) ქსელს, რომელიც ევროკავშირის მიერ დაფინანსებული EU NEIGHBOURS EAST პროგრამის ფარგლებში მოქმედებს. 

ვიზიტისას კიდევ ერთხელ გაესვა ხაზი ევროკავშირის მზაობას, ხელი შეუწყოს სათემო ინიციატივებს, ადგილობრივ მეწარმეობასა და სოფლის მდგრად განვითარებას. ელჩმა ჰერჩინსკიმ ადგილობრივი საწარმოებიც მოინახულა — მათ შორის ქედაში მდებარე ნური სირაბიძის ღვინის მარანი, რომელმაც დახმარება FAO-ს ინიციატივის ფარგლებში მიიღო; ასევე სასტუმრო-კოტეჯი „ვუდჰაიდი“, რომელიც მაჭახელას ეროვნულ პარკში მდებარეობს და ENPARD-ისა და UNDP-ის პროგრამების დახმარებით მოეწყო. 

ელჩის ვიზიტი სასულიერო პირებთან შეხვედრით დასრულდა, სადაც განმეორებით აღინიშნა ევროკავშირის მზაობა, ხელი შეუწყოს რელიგიურ ტოლერანტობასა და მშვიდობიან თანაარსებობას.

დამატებითი ინფორმაცია

პრესრელიზი

ახალგაზრდა ევროპელი ელჩები ქედაში ახალ ევროკლუბს ხსნიან