ევროკავშირის ელჩები რუსეთის და ბელარუსის წინააღმდეგ მიმართული სანქციების მეექვსე პაკეტის მიღებას დაეთანხმნენ

2 ივნისს ევროკავშირში მუდმივ წარმომადგენელთა კომიტეტი (COREPER II) დაეთანხმა სანქციების მეექვსე პაკეტს, რომელიც 30 მაისს ევროპულმა საბჭომ  საგანგებო შეხვედრაზე წარადგინა. 

სანქციების ამ პაკეტში შედის:

• სანქციები უსაფრთხოების და სამხედრო აპარატის იმ წარმომადგენლების წინააღმდეგ, რომლებიც დაკავშირებულები არიან ბუჩაში მომხდარ მასობრივ ხოცვა-ჟლეტასთან; ასევე, რუსეთის აგრესიასთან დაკავშირებული სამრეწველო და ტექნოლოგიური სექტორის ორგანიზაციების, ოლიგარქების, რუსული პოლიტიკის პროპაგანდისტების და მათი ოჯახის წევრების წინააღმდეგ.
• რუსეთიდან ზღვის გავლით ნავთობის იმპორტის აკრძალვა. ეს აკრძალვა –  გერმანიის და პოლონეთის მიერ ეროვნულ დონეზე მიღებულ გადაწყვეტილებებთან ერთად – რუსეთიდან ნავთობის იმპორტს მიმდინარე წლის ბოლომდე 92%-ით შეამცირებს. 
• ამ გადაწყვეტილებას რაც შეიძლება მალე დაემატება რუსეთიდან ნავთობის მილსადენის საშუალებით იმპორტის აკრძალვაც.
• SWIFT-ის მომსახურების სისტემიდან სამი რუსული ბანკის – მათ შორის „სბერბანკის“ – და ბელარუსის ერთი ბანკის გათიშვა. 
• რუსეთში ექსპორტის აკრძალვის გახანგრძლივება – მათ შორის ქიმიკატებსა და მაღალტექნოლოგიურ პროდუქციაზე.
• რუსეთის ნავთობის სექტორისთვის მომსახურების მიწოდების აკრძალვა.
• რუსული პროპაგანდის გამავრცელებელი სამი მასობრივი ინფორმაციის საშუალების აკრძალვა.
• რუსეთის ოპერატორებისთვის საკონსულტაციო მომსახურების გაწევის აკრძალვა.

სანქციების ამ პაკეტს ევროპული საბჭო წერილობითი პროცედურით დაამტკიცებს იმის გათვალისწინებით, რომ შესაბამისი ტექსტი ევროკავშირის ოფიციალურ ჟურნალში 3 ივნისს გამოქვეყნდება.

დამატებითი ინფორმაცია

პრესრელიზი