ევროკავშირის დაფინანსებული პროექტი QUIS საქართველოში პროდუქტებისა და მომსახურების ხარისხს გააუმჯობესებს

საქართველოში ევროკავშირის წარმომადგენლობის 2 აგვისტოს გაკეთებული განცხადების თანახმად, დაიწყო ევროკავშირის მიერ დაფინანსებული ახალი პროექტი, რომელიც პროდუქციისა და მომსახურების ხარისხის გაუმჯობესებაზე იზრუნებს. პროექტს გერმანიის თანამშრომლობა (GIZ) და ჩეხეთის განვითარების სააგენტო (CzDA) ახორციელებენ.

„QUIS — უკეთესი პროდუქტი, უკეთესი მომსახურება“ ხელს შეუწყობს ევროპული სტანდარტების დანერგვას აკრედიტებულ ლაბორატორიებსა და სერტიფიცირების ორგანოებში და მათ მომსახურებას კერძო სექტორისთვის მეტად ხელმისაწვდომს გახდის. ეს ქართულ ბიზნესს დაეხმარება, გაზარდოს ექსპორტი და გააუმჯობესოს წვდომა ევროპულ ბაზარზე, რომელიც 27 ქვეყანასა და 500 მილიონზე მეტ მომხმარებელს აერთიანებს.

პროექტი იმუშავებს ინდუსტრიულ სექტორებთან, ასევე ადგილობრივ მწარმოებლებთან ავეჯისა და სათამაშოების წარმოების მიმართულებით. 

ინიციატივის მთავარი მიზნებია პროდუქტების ხარისხის გაუმჯობესება, მომსახურების ხარისხის გაუმჯობესება, მომხმარებელთა ინფორმირებულობის გაზრდა და ინოვაციებისა და ტექნოლოგიების მხარდაჭერა.

„პროექტი QUIS ევროკავშირის მიერ დაფინანსებული ერთ-ერთი უახლესი ინიციატივაა, რომელიც გააუმჯობესებს ხარისხის ინფრასტრუქტურას, რათა ხელი შეეწყოს საქართველოში მოქმედი ბიზნესების განვითარებას, ინოვაციურობასა და კონკურენტუნარიანობას. ეს მხარდაჭერა ქართველ მომხმარებლებს მისცემს საშუალებას, ევროკავშირის წევრი ქვეყნების მსგავსად ისარგებლონ მაღალი ხარისხის პროდუქტითა და მომსახურებით“, – განაცხადა საქართველოში ევროკავშირის წარმომადგენლობის განვითარებისა და თანამშრომლობის ხელმძღვანელმა, ნიკოლას სენდროვიჩმა.

პროექტის მთლიანი ბიუჯეტი დაახლოებით 12 მილიონ ევროს შეადგენს და ის 2027 წლის იანვრამდე გაგრძელდება.

დამატებითი ინფორმაცია

პრესრელიზი