ევროკავშირის და დიდი შვიდეულის სპეციალურმა ჯგუფმა რუსეთის სანქცირებულ მოქალაქეებს 30 მილიარდი დოლარის ქონება გაუყინა
ივლისი 1, 2022

ევროკავშირის და დიდი შვიდეულის სპეციალურმა ჯგუფმა რუსეთის სანქცირებულ მოქალაქეებს 30 მილიარდი დოლარის ქონება გაუყინა


რუსეთის ელიტის, ნდობით აღჭურვილი პირების და ოლიგარქების (REPO) საკითხებზე მომუშავე სპეციალურმა ჯგუფმა 100-დღიანი მუშაობის პერიოდში რუსეთის სანქცირებული მოქალაქეების 30 მილიარდ დოლარზე მეტი მოცულობის აქტივები გაყინა. გარდა ამისა, სპეციალურმა ჯგუფმა სანქციებს დაქვემდებარებულ პირებს ძვირადღირებული საქონელიც გაუყინა ან ჩამოართვა. ამ გზით აღნიშნული პირებს საერთაშორისო ფინანსურ სისტემაზე წვდომა მნიშვნელოვნად შეეზღუდათ. 

სპეციალური ჯგუფი აპრილის შუა რიცხვებში შეიქმნა, რათა მაქსიმალურად გაეძლიერებინა სანქციების გავლენა იმ პირებსა და ორგანიზაციებზე, რომლებიც მხარს უჭერენ რუსეთის ომს უკრაინის წინააღმდეგ. REPO-ს ფარგლებში ევროკავშირი დიდი შვიდეულის ქვეყნებთან — კანადასთან, საფრანგეთთან, გერმანიასთან, იტალიასთან, იაპონიასთან, გაერთიანებულ სამეფოსთან და აშშ-სთან — და ავსტრალიასთან თანამშრომლობს.

მჭიდრო ეროვნული და საერთაშორისო თანამშრომლობის გზით, სპეციალური ჯგუფის წევრებმა: 

  • დაბლოკეს ან გაყინეს სანქცირებული რუსი მოქალაქეების ფინანსური ანგარიშების და ეკონომიკური რესურსების სახით არსებული 30 მილიარდი დოლარის ღირებულების აქტივები;
  • მიმოქცევიდან ამოიღეს რუსეთის ცენტრალური ბანკის დაახლოებით 300 მილიარდი დოლარის ღირებულების აქტივები;
  • სანქცირებულ რუს მოქალაქეებს ჩამოართვეს, დაუყადაღეს ან დაუკავეს მათ კუთვნილებაში, სარგებლობაში ან კონტროლის ქვეშ მყოფი იახტები და სხვა ხომალდები;
  • სანქცირებულ რუს მოქალაქეებს ჩამოართვეს ან დაუყადაღეს კუთვნილებაში, სარგებლობაში ან კონტროლის ქვეშ მყოფი ძვირადღირებული უძრავი ქონება; 
  • შეზღუდეს რუსეთის წვდომა გლობალურ ფინანსურ სისტემაზე, რაც რუსეთს უკრაინაში უსამართლო ომის საწარმოებლად საჭირო ტექნოლოგიების შესყიდვას ურთულებს.

სპეციალური ჯგუფის წევრები ამბობენ, რომ სანქცირებული რუსი მოქალაქეების აქტივების მონიტორინგს მომავალ თვეებშიც გააგრძელებენ და არ მისცემენ მათ ერთობლივად დაწესებული შემზღუდველი ზომების დარღვევის საშუალებას.

„ჩვენ კვლავ ვუზრდით რუსეთს მის მიერ წარმოებული ომის ფასს“, — აცხადებენ ისინი.  

დამატებითი ინფორმაცია

პრესრელიზი



გაინტერესებთ უკანასკნელი ცნობები და შესაძლებლობები?

ამ ვებსაიტს მართავს ევროკავშირის მიერ დაფინანსებული აღმოსავლეთ სამეზობლოს რეგიონული საკომუნიკაციო პროგრამა („EU NEIGHBOURS east“) 2020-2024. ეს პროგრამა ავსებს და მხარს უჭერს ევროკავშირის წარმომადგენლობების კომუნიკაციას აღმოსავლეთ პარტნიორობის ქვეყნებში; ის მოქმედებს სამეზობლო პოლიტიკის და გაფართოებაზე მოლაპარაკებების საკითხებში ევროკომისიის გენერალური დირექტორატის და ევროპული საგარეო ქმედებათა სამსახურის ხელმძღვანელობით. პროგრამას ახორციელებს კომპანიის GOPA PACE კონსორციუმი.


ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,