ევროკავშირის ახალი კვლევის მიხედვით, საქართველოს მოსახლეობამ პანდემიის პერიოდში კრიზისისადმი გამძლეობა გამოავლინა

ევროპის განათლების ფონდის (ETF) და Eurofound-ის ახალი კვლევის თანახმად, ევროკავშირსა და მისი სამეზობლოს ათ ქვეყანაში — მათ შორის საქართველოში — მოქალაქეებმა COVID-19-ის პანდემიის პერიოდში გამძლეობა და სწრაფი რეაგირების უნარი გამოავლინეს. ანგარიში სახელწოდებით, „ცხოვრება, მუშაობა და COVID-19“, ასკვნის, რომ, გამოწვევების მიუხედავად, ამ ქვეყნების მოსახლეობამ ოპტიმიზმის შენარჩუნება შეძლო.

ანგარიშის თანახმად, პანდემიამ ევროკავშირის სამეზობლოს ქვეყნების მოსახლეობა ფინანსური დაუცველობისა და სოციალური კატაკლიზმების პირისპირ დააყენა. კერძოდ, მოქალაქეთა დაახლოებით 81% სიღარიბის საფრთხის წინაშეა, ხუთიდან ერთმა ადამიანმა სამსახური დაკარგა ან მას სამუშაო საათები შეუმცირდა, ხოლო 18-იდან 44 წლამდე პირების 75%-ს დეპრესია აქვს. მიუხედავად ამისა, ადამიანთა 63% მომავლის მიმართ კვლავ ოპტიმისტურად არის განწყობილი — მაშინ, როცა ევროკავშირში ამ განწყობას მოსახლეობის მხოლოდ 50% იზიარებს.

რაც შეეხება დისტანციურ მუშაობას, ევროკავშირის სამეზობლოს ქვეყნებში ადამიანთა მნიშვნელოვან რაოდენობას ამისთვის საჭირო აღჭურვილობა და ტექნოლოგია არ მოეპოვება. შედეგად, იმ დასაქმებულთა წილი, რომლებიც არასოდეს მუშაობენ დისტანციურად, ამ ქვეყნებში 62%-ს შეადგენს, ევროკავშირის 23%-თან შედარებით. ამავე დროს, სამეზობლოს ქვეყნებში დასაქმებულ რესპონდენტთა 53%-მა განაცხადა, რომ მათი დამსაქმებლები სამუშაოსთან დაკავშირებულ ტრენინგებს არ ანაზღაურებენ.

„’პროფესიული უნარების ევროპული წლის’ მოახლოებასთან ერთად, ეს ანგარიში საჭირო უნარების განვითარების მიმართულებით მოქმედებისკენ გვიბიძგებს“, — ნათქვამია ETF-ის პრესრელიზში, — „ევროკავშირის ინიციატივა დაეხმარება მცირე და საშუალო საწარმოთა თანამშრომლებს, დასძლიონ საჭირო პროფესიული ცოდნის დეფიციტი და განივითარონ უკვე შეძენილი უნარები. ეს, თავის მხრივ, ხელს შეუწყობს ევროკავშირის 2023 წლის სოციალურ მიზნებს, რაშიც ზრდასრულთა 60%-ის ყოველწლიურ ტრენინგში მონაწილეობა და დასაქმების 78%-იანი მაჩვენებლის მიღწევაც შედის“.

დამატებითი ინფორმაცია
პრესრელიზი