ევროკავშირი საქართველოში საგზაო უსაფრთხოების მართვის გასაუმჯობესებლად „ტვინინგის“ ახალ პროექტს იწყებს

ევროკავშირმა დაიწყო დაძმობილების, იმავე „ტვინინგის“ ახალი პროექტი, რომელიც საქართველოს საგზაო უსაფრთხოების პოლიტიკის განვითარებას ინსტიტუციურ დონეზე დაეხმარება. ინიციატივა, ამასთან, საგზაო შემთხვევების მონაცემების შეგროვებისა და ანალიზის მეთოდების ხარისხსაც გააუმჯობესებს. 

პროექტის, „საგზაო უსაფრთხოების ერთიანი მონაცემთა ბაზის ჩამოყალიბების და საგზაო უსაფრთხოების მართვის შემდგომი გაუმჯობესების მხარდაჭერა საქართველოში“, ბიუჯეტი 1.3 მილიონ ევროს შეადგენს და ის ორ წელიწადს გაგრძელდება. 

‎“სამწუხაროდ,  საქართველოში ყოველწლიურად უამრავი ადამიანი იღუპება ან ზიანდება ავტოსაგზაო შემთხვევების შედეგად. ევროკავშირის გამოცდილებიდან გამომდინარე, არსებობს სიტუაციის გაუმჯობესებისა და საგზაო შემთხვევების რაოდენობის შემცირების მკაფიო შესაძლებლობები. ევროკავშირის მხრიდან უკეთესი და მეტად უსაფრთხო გზების მშენებლობის მხარდაჭერით, ეს პროექტი, რომელსაც პოლონელი და ლიეტუველი პარტნიორები განახორციელებენ, ქვეყანაში საგზაო უსაფრთხოების პირობებს გააუმჯობესებს“, – განაცხადა საქართველოში ევროკავშირის წარმომადგენლობის ჯგუფის ლიდერმა, ალექსანდრე დარასმა.

საგზაო უსაფრთხოების მონაცემების მართვაში ჩართული პერსონალის შესაძლებლობების გაზრდით, დაძმობილების პროექტი საგზაო უსაფრთხოების ელექტრონულ მონაცემთა ბაზებს გააუმჯობესებს. გარდა ამისა, ის შესაბამის ეროვნულ სააგენტოებში მონაცემთა მართვის ეფექტიანი სისტემისა და ტრავმის ეროვნული რეესტრის ჩამოყალიბებას შეუწყობს ხელს.

დამატებითი ინფორმაცია

პრესრელიზი