ევროკავშირი საქართველოს ხელისუფლებას მედიის მფლობელთა წინააღმდეგ აღძრულ საქმეებში უმაღლესი იურიდიული სტანდარტების უზრუნველყოფისკენ მოუწოდებს

ევროკავშირი მოუწოდებს საქართველოს ხელისუფლებას, უზრუნველყოს უმაღლესი იურიდიული სტანდარტები მედიის მფლობელების წინააღმდეგ მიმართულ სამართლებრივ პროცედურებთან დაკავშირებით.

თბილისის სააპელაციო სასამართლომ 2 ნოემბერს გადაწყვიტა, ძალაში დატოვოს საქართველოს ერთ-ერთი ტელეკომპანიის გენერალური დირექტორის, ნიკა გვარამიას მიმართ წაყენებული ბრალდება 3 წლითა და 6 თვით თავისუფლების აღკვეთის შესახებ. ამასთან დაკავშირებით ევროკავშირმა განაცხადა, რომ ის ამ საქმეს ყურადღებით აკვირდება.

„ევროკავშირი ინდივიდუალური საქმეების კონკრეტული გარემოებების შესახებ კომენტარს არ აკეთებს, მაგრამ კიდევ ერთხელ აღვნიშნავთ, რომ ამ საქმესთან დაკავშირებით დაისვა კითხვები, მათ შორის სახალხო დამცველის მხრიდან“, — ნათქვამია ევროკავშირის საგარეო ქმედებათა სამსახურის პრესრელიზში.

აქვე ვკითხულობთ, რომ ევროკავშირი კვლავ სრულად მზადაა, მხარი დაუჭიროს საქართველოს თორმეტი პრიორიტეტის შესრულებაში, რათა ქვეყანამ გაამართლოს თავისი მოქალაქეების იმედები ევროპულ მისწრაფებებთან დაკავშირებით.

ამ კუთხით, ევროკავშირი ხაზს უსვამს, რომ ევროკომისიის მიერ განსაზღვრული ერთ-ერთი პრიორიტეტია „უფრო ძლიერი ძალისხმევა თავისუფალი, პროფესიული, პლურალისტური და დამოუკიდებელი მედიაგარემოს უზრუნველსაყოფად — განსაკუთრებით იმისათვის, რომ მედიის მფლობელთა წინააღმდეგ მიმართული სისხლის სამართლებრივი პროცედურები აკმაყოფილებდეს უმაღლეს იურიდიულ სტანდარტებს“. 

დამატებითი ინფორმაცია

პრესრელიზი