ევროკავშირი რუსეთს საზღვარგარეთ დესტაბილიზაციის გამომწვევი ქმედებებისთვის სანქციების ახალ მექანიზმს უწესებს
8 ოქტომბერს ევროპის კავშირის საბჭომ რუსეთს საზღვარგარეთ დესტაბილიზაციის გამომწვევი ქმედებების საპასუხოდ შემზღუდველი ზომების ახალი მექანიზმი დაუწესა.
მექანიზმი ევროკავშირს უფლებას მისცემს, სამიზნეში ამოიღოს რუსეთის ფედერაციის მთავრობის იმ ქმედებებსა და პოლიტიკურ გადაწყვეტილებებში ჩართული ინდივიდები თუ ერთეულები, რომლებიც ევროკავშირისა და მისი წევრი სახელმწიფოების, ასევე საერთაშორისო ორგანიზაციებისა და მესამე ქვეყნების, ფუნდამენტურ ღირებულებებს, უსაფრთხოებას, დამოუკიდებლობასა და ერთიანობას უთხრის ძირს.
ამიერიდან ევროკავშირი შეძლებს, დაუპირისპირდეს ისეთ ჰიბრიდულ საფრთხეებს, როგორებიცაა: საარჩევნო პროცესებისა და დემოკრატიული ინსტიტუტების ფუნქციონირების ხელისშემშლელი ქმედებები; ეკონომიკური საქმიანობებისადმი, საზოგადოებრივი ინტერესის მქონე მომსახურებებისა თუ კრიტიკული უსაფრთხოებისადმი საფრთხის შექმნა და საბოტაჟი; კოორდინირებული დეზინფორმაციის, ინფორმაციით მანიპულირებისა და გარე ჩარევის (FIMI) გამოყენება; მავნე კიბერაქტივობები, მიგრანტების ინსტრუმენტალიზება და დესტაბილიზაციის გამომწვევი სხვა ქმედებები.
ამ მექანიზმის ქვეშ მოხვედრილ პირებს თუ ერთეულებს გაეყინებათ აქტივები, ხოლო ევროკავშირის მოქალაქეებსა და კომპანიებს აეკრძალებათ მათთვის თანხების მიწოდება. ამას გარდა, ფიზიკურ პირებს შეეხებათ სამოგზაურო აკრძალვაც, რის საფუძველზეც ევროკავშირის ტერიტორიაზე შესვლას ან გადაადგილებას ვეღარ შეძლებენ
ევროკავშირის სახელით გაკეთებულ ამ განცხადებაში ევროკავშირის უმაღლესმა წარმომადგენელმა, ჯოზეფ ბორელმა მკაცრად დაგმო რუსეთის მიერ ევროკავშირის, მისი წევრი სახელმწიფოებისა და პარტნიორების წინააღმდეგ ჰიბრიდული აქტივობების კამპანიის გაძლიერება.
მან დაურთო, რომ რუსეთის ქმედებები, სხვა სამიზნეებთან ერთად, მიმართულია უკრაინისადმი ევროკავშირის მხარდაჭერის აღმოფხვრისაკენ და ქვეყნის თავდაცვის უნარის განადგურებისაკენ. „ამას ვერ მიაღწევენ: ჩვენ ერთად და მიზანდასახულად ვიმოქმედებთ ამ ქმედებათა საპასუხოდ და დამნაშავეებს პასუხს ვაგებინებთ. ჩვენ გავაგრძელებთ უკრაინისადმი მძლავრ და უპირობო მხარდაჭერას მანამ, სანამ საჭირო იქნება“, – აღნიშნა ბორელმა.
დამატებითი ინფორმაცია
ყველაზე წაკითხული
თემაზე
ევროკავშირისა და UNDP-ის ხელშეწყობით, საქართველოს მცირე და საშუალო ბიზნესი საერთაშორისო ბაზრებს ითვისებს
მამის დღე საქართველოში: UNFPA და ევროკავშირი ახალბედა მამებისთვის წიგნს წარმოადგენენ
ახალგაზრდა ევროპელი ელჩები ურთიერთობების, შთაგონების და ცვლილების ათწლეულს აღნიშნავენ
ევროკავშირის ინიციატივა, „საქართველო მწვანე მომავლისკენ“, 14 ივნისს თბილისში „შეკეთებისა და ხელახლა გამოყენების დღეს“ მართავს
ევროკომისია ევროკავშირის ინოვაციების პლატფორმას აამოქმედებს
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
