ევროკავშირი გიორგი გახარიაზე სასტიკ თავდასხმაში „ქართული ოცნების“ ჩართულობას „შოკისმომგვრელს“ უწოდებს 

„გავრცელებული ცნობებით, საქართველოს ყოფილ პრემიერ-მინისტრსა და ოპოზიციის ლიდერ გიორგი გახარიაზე სასტიკ თავდასხმაში ’ქართული ოცნების’ პოლიტიკოსების მონაწილეობა შოკისმომგვრელია“, – 15 იანვარს X პლატფორმაზე განაცხადა საგარეო ურთიერთობებისა და უსაფრთხოების პოლიტიკის საკითხებში ევროკავშირის წამყვანმა სპიკერმა, ანიტა ჰიპერმა. 

გახარიას 14 იანვრის საღამოს ბათუმის სასტუმროში ჯგუფურად დაესხნენ თავს. 

„ძალადობისა და დაუსჯელობის ადგილი არ არის არცერთ დემოკრატიაში – რომ აღარაფერი ვთქვათ ევროკავშირის კანდიდატ ქვეყანაზე“, – აღნიშნა ანიტა ჰიპერმა.

15 იანვარს ევროკავშირის წარმომადგენლობამ საქართველოში გაავრცელა განცხადება, რომელშიც ხაზი გაუსვა, რომ საქართველოს მოქალაქეებს კვლავ ემუქრება დაკავება ფუნდამენტური უფლებებით სარგებლობის გამო. 

„მზია ამაღლობელის [ონლაინგამოცემების, „ნეტგაზეთისა“ და „ბათუმელების“ თანადამფუძნებელი და დირექტორი] და გურამ მურვანიძის [„ბათუმელების“ ოპერატორი] დაპატიმრება გამოხატვის თავისუფლებას უფრო მეტად აკნინებს. ყველა უსამართლოდ დაკავებული უნდა გათავისუფლდეს. ევროკავშირი სამართლიანი სასამართლოს უფლების დაცვისკენ მოუწოდებს. დაუსჯელობა ვერ გაიმარჯვებს“, – ვკითხულობთ ევროკავშირის წარმომადგენლობის მიერ ფეისბუქზე გამოქვეყნებულ განცხადებაში. 

დამატებითი ინფორმაცია

პრესრელიზი