ევროკავშირი და UNDP სამეგრელოს კონფლიქტით დაზარალებულ თემებში ამბულატორიებს აახლებენ

ევროკავშირმა და გაეროს განვითარების პროგრამამ (UNDP) ზუგდიდის მახლობლად მდებარე სოფლებში, ორსანტიასა და რიყეში ამბულატორიები განაახლეს. რეაბილიტირებული ამბულატორიებით სამეგრელოს რეგიონში მცხოვრები 5,500-ზე მეტი ადამიანი ისარგებლებს. 

18 იანვარს დელეგაცია, რომლის შემადგენლობაში საქართველოში ევროკავშირის წარმომადგენლობის, UNDP-ისა და ადგილობრივი ხელისუფლების ოფიციალური პირები შედიოდნენ, სამეგრელოს ეწვია. სტუმრებმა ახალი ამბულატორიები მოინახულეს და კონფლიქტით დაზარალებულ ადგილობრივ მოსახლეობას შეხვდნენ.

რეაბილიტაციის პროექტი ამბულატორიების სანტექნიკის, ელექტრო და გათბობის სისტემებისა და ინტერიერის განახლებას მოიცავდა. რეაბილიტაციისას განსაკუთრებული ყურადღება მიექცა შეზღუდული შესაძლებლობის მქონე პირთათვის ხელმისაწვდომობის გაუმჯობესებას.

ორსანტიასა და რიყეში ამბულატორიების რეაბილიტაციის პროექტის მსგავსი ინიციატივა შიდა ქართლის სოფელ მეჯვრისხევშიც უკვე განხორციელდა. მეჯვრისხევში განახლებული ამბულატორიით დღეს 6,000-მდე ადამიანს შეუძლია სარგებლობა. 

სოფლებში ამბულატორიები პროექტის, „EU4Dialogue: კონფლიქტის ტრანსფორმაციის მხარდაჭერა სამხრეთ კავკასიასა და მოლდოვის რესპუბლიკაში“, ფარგლებში განახლდა. ევროკავშირის და UNDP-ის ეს ერთობლივი ინიციატივა EU4Dialogue პროგრამის ნაწილია. პროექტი ადგილობრივ სამოქალაქო საზოგადოების ორგანიზაციებთან და სათემო ჯგუფებთან თანამშრომლობს, რათა ადგილობრივი მოსახლეობისა და ადგილნაცვალი პირების სოციალური და ეკონომიკური პირობების გაუმჯობესებას შეუწყოს ხელი.

დამატებითი ინფორმაცია

პრესრელიზი