ევროკავშირი და UNDP საქართველოს რეგიონებში მმართველობის, პოლიტიკისა და სერვისების გაუმჯობესებას უწყობენ ხელს

ევროკავშირმა და გაეროს განვითარების პროგრამამ (UNDP), საქართველოს ადგილობრივ თვითმმართველობათა ეროვნულ ასოციაციასთან პარტნიორობით, ადგილობრივი პროექტების განსახორციელებლად ექვსი მუნიციპალიტეტი შეარჩია. პროექტების ძირითადი მიმართულებებია ურბანული გარდაქმნის ხელშეწყობა, საზოგადოებრივი სივრცეების რეაბილიტაცია და მოწყობა, ისტორიული და კულტურული მემკვიდრეობის დაცვა, სკოლამდელი განათლების გაუმჯობესება და ხარისხიანი მუნიციპალური სერვისების განვითარება.

ჟიურიმ 22 მუნიციპალიტეტის მიერ წარდგენილი 52 იდეიდან ექვსი საუკეთესო შეარჩია. თითოეული გამარჯვებული 4,500-იდან 6,000-მდე ევროს ოდენობის დაფინანსებას მიიღებს. საგრანტო პროგრამის მთლიანი ღირებულება 30,800 ევროს შეადგენს.

წყალტუბოს მუნიციპალიტეტის სოფელ ჩუნეშში (იმერეთი) ნიკო ლორთქიფანიძის სახლ-მუზეუმის ეზოში მულტიფუნქციური დასასვენებელი სივრცე მოეწყობა.

ზესტაფონის მუნიციპალიტეტში (იმერეთი) ოთხი საბავშვო ბაღი სასწავლო და სპორტული აქტივობებისთვის განკუთვნილი ავეჯითა და ინვენტარით აღიჭურვება.

ლაგოდეხის მუნიციპალიტეტში (კახეთი) ახლად რეაბილიტირებული მუზეუმის ბიბლიოთეკაში გაიხსნება მედიათეკა, რომელშიც მოეწყობა საგანმანათლებლო აქტივობები და ფილმების ჩვენება.

თელავის მუნიციპალიტეტში (კახეთი) 32 ბაგა-ბაღის 96 თანამშრომელი პირველადი დახმარების აღმოჩენაში სასერტიფიკატო ტრენინგს გაივლის. გარდა ამისა, ორ ბაგა-ბაღს სამედიცინო კაბინეტების აღჭურვილობაც გადაეცემა.

ონის მუნიციპალიტეტში (რაჭა-ლეჩხუმი და ქვემო სვანეთი) ონის ერთ-ერთ ახლად გარემონტებულ მოედანზე გაიხსნება ღია საზაფხულო კინოთეატრი, სადაც ახალგაზრდებისთვის კინოჩვენებები, საგანმანათლებლო შეხვედრები და შემეცნებით დისკუსიები მოეწყობა.

ცაგერის მუნიციპალიტეტში (რაჭა-ლეჩხუმი და ქვემო სვანეთი) ხელი შეეწყობა სკოლამდელი განათლების მუნიციპალური სისტემის ციფრულ გარდაქმნას. შედეგად, შესაძლებელი გახდება ბაღების აღსაზრდელთა ელექტრონული რეგისტრაცია და ბაღის აღმზრდელების ონლაინ ტრენინგი.

ინიციატივას მხარს უჭერს ევროკავშირის მიერ დაფინანსებული პროგრამა, ევროკავშირი ინტეგრირებული ტერიტორიული განვითარებისთვის (EU4ITD), რომელიც საქართველოს რეგიონებში დაბალანსებულ ტერიტორიულ განვითარებას და ცხოვრების სტანდარტის გაუმჯობესებას უწყობს ხელს.

დამატებითი ინფორმაცია

პრესრელიზი