ევროკავშირი და მისი პარტნიორები ჩრდილოეთ კორეის მიერ რუსეთისთვის ბალისტიკური რაკეტების მიწოდებას გმობენ 

ევროკავშირმა და მისმა პარტნიორებმა უმკაცრესად დაგმეს კორეის სახალხო დემოკრატიული რესპუბლიკის (კსდრ) მიერ რუსეთისთვის ბალისტიკური რაკეტების მიწოდება და რუსეთის მიერ ამ რაკეტების 2023 წლის 30 დეკემბერსა და 2024 წლის 2 იანვარს უკრაინის წინააღმდეგ გამოყენება.

9 იანვარს გამოქვეყნებულ განცხადებას ხელს აწერენ ევროკავშირის უმაღლესი წარმომადგენელი ჯოზეფ ბორელი, ევროკავშირის 25 ქვეყნის საგარეო საქმეთა მინისტრები, საქართველოს, მოლდოვისა და უკრაინის საგარეო საქმეთა მინისტრები, ასევე ავსტრალიის, ალბანეთის, ანდორის, არგენტინის, ახალი ზელანდიის, გვატემალის, დიდი ბრიტანეთის, იაპონიის, ისლანდიის, ისრაელის, კანადის, კორეის რესპუბლიკის, ლიხტენშტაინის, მონაკოს, მონტენეგროს, ნორვეგიის, პალაუს, სან მარინოს და ჩრდილოეთ მაკედონიის საგარეო საქმეთა მინისტრები და ამერიკის შეერთებული შტატების სახელმწიფო მდივანი.

„ამ იარაღის გადაცემა ზრდის უკრაინელი ხალხის ტანჯვას, მხარს უჭერს რუსეთის აგრესიულ ომს და ძირს უთხრის გლობალურ გაუვრცელებლობის რეჟიმს. ჩვენ ძლიერ გვაშფოთებს, თუ რა გავლენა შეიძლება ჰქონდეს ამ თანამშრომლობას ევროპის, კორეის ნახევარკუნძულის, ინდო-წყნარი ოკეანის რეგიონისა და მთელი მსოფლიოს უსაფრთხოებაზე“, — ნათქვამია განცხადებაში.

მასში ასევე ხაზგასმულია, რომ ბალისტიკური რაკეტების — ისევე, როგორც სხვა ნებისმიერი იარაღის და შესაბამისი ტექნიკის — ჩრდილოეთ კორეიდან რუსეთში გადატანა უხეშად არღვევს გაეროს უშიშროების საბჭოს არაერთ რეზოლუციას (UNSCRs), კერძოდ, რეზოლუცია 1718-ს (2006 წელი), რეზოლუცია 1874-ს (2009 წელი) და რეზოლუცია 2270-ს (2016 წელი), რომელსაც თავად რუსეთმა დაუჭირა მხარი.

„ჩვენ ზედმიწევნით ვაკვირდებით, თუ რას აწვდის რუსეთი კსდრ-ს ამ იარაღის ექსპორტის სანაცვლოდ. ჩვენ მოვუწოდებთ კსდრ-სა და რუსეთს, დაემორჩილონ გაეროს უშიშროების საბჭოს შესაბამის რეზოლუციებს და დაუყოვნებლივ შეწყვიტონ ყველა ის ქმედება, რომელიც ამ რეზოლუციებს არღვევს“, — აცხადებენ ევროკავშირი და მისი პარტნიორები.

დამატებითი ინფორმაცია

პრესრელიზი