ევროკავშირი და EBRD საქართველოს კაპიტალის ბაზარზე მწვანე ობლიგაციების განთავსებას უჭერენ მხარს

ევროკავშირმა და ევროპის რეკონსტრუქციისა და განვითარების ბანკმა (EBRD) დაასახელეს პირველი გამარჯვებული, რომელიც გრანტს კაპიტალის ბაზრის მხარდაჭერის პროგრამის ფარგლებში მიიღებს.

„საქართველოს განახლებადი ენერგიის ოპერაციების“ (GRPO) მიერ გამოშვებული 80 მილიონი აშშ დოლარის ოდენობის მწვანე ობლიგაციების განთავსება საქართველოს კაპიტალის ბაზარზე უმსხვილეს ტრანზაქციას წარმოადგენს. ეს, ამასთან, ქვეყანაში მწვანე ობლიგაციების გამოშვების პირველი შემთხვევაცაა. 

კომპანია ბონდების გამოშვებასთან დაკავშირებული ხარჯების თანადაფინანსების უზრუნველსაყოფად ევროკავშირისაგან მნიშვნელოვან ფინანსურ დახმარებას მიიღებს. მხარდაჭერის მექანიზმს კი EBRD უზრუნველყოფს.

„იმედი მაქვს, რომ პროგრამა წაახალისებს მწვანე და მდგრადი ობლიგაციების გამოშვებას ქვეყანაში და განახლებადი ენერგიის სხვა ოპერატორებსაც მისცემს დამატებით მოტივაციას, დააკმაყოფილონ გარემოსდაცვითი, სოციალური და მმართველობის მაღალი სტანდარტები. ჩვენ ძალიან ვამაყობთ, რომ ამ მხრივ პირველები ვართ და წვლილი შევიტანეთ საქართველოს განახლებადი ენერგიის სექტორის განვითარებაში“, — აღნიშნა GRPO-ს ფინანსურმა დირექტორმა, ნუკა მშვიდობაძემ.

ევროკავშირის მიერ დაფინანსებული კაპიტალის ბაზრის მხარდაჭერის პროგრამის მიზანია, საქართველოში კაპიტალის ბაზრის განვითარებას საგანმანათლებლო ღონისძიებებითა და მხარდაჭერის მექანიზმის უზრუნველყოფით შეუწყოს ხელი.

დამატებითი ინფორმაცია

პრესრელიზი