ევროკავშირი წუხილს გამოთქვამს „ქართული ოცნების“ გადაწყვეტილების გამო არ გახსნას მოლაპარაკებები ევროკავშირში გაწევრიანების თაობაზე და უარი თქვას ევროკავშირის ფინანსურ მხარდაჭერაზე 2028 წლამდე
ევროკავშირი წუხილს გამოთქვამს საქართველოს პრემიერ-მინისტრის ირაკლი კობახიძის განცხადების გამო „ქართული ოცნების“ გადაწყვეტილების თაობაზე არ გახსნას მოლაპარაკებები ევროკავშირში გაწევრიანებაზე და უარი თქვას ევროკავშირის ფინანსურ მხარდაჭერაზე 2028 წლამდე, აღნიშნულია ევროკავშირის უმაღლესი წარმომადგენლის კაია კალასის და გაფართოების საკითხებში კომისრის მარტა კოსის 1 დეკემბრის ერთობლივ განცხადებაში.
მათი სიტყვებით, ეს განცხადება „ნიშნავს, რომ საქართველომ გადაუხვია ყველა წინა მთავრობის პოლიტიკიდან და ქართველი ხალხის აბსოლუტური უმრავლესობის ევროპული მისწრაფებიდან, როგორც ამას საქართველოს კონსტიტუცია ითვალისწინებს“.
„შეგახსენებთ, რომ საქართველოს ხელისუფლების მოქმედებათა კურსმა და დემოკრატიის გზაზე უკან დახევამ განაპირობა გაწევრიანების პროცესის დე ფაქტო შეჩერება ჯერ კიდევ მიმდინარე წლის ივნისში, და რომ ევროკავშირის ფინანსური დახმარება, რომელიც უშუალოდ საქართველოს ხელისუფლებისთვის არის განკუთვნილი, ამჟამად შეჩერებულია“, – ნათქვამია განცხადებაში.
კალასმა და კოსმა ასევე დაგმეს ძალადობა მშვიდობიანი მომიტინგეების წინააღმდეგ და განაცხადეს, რომ ეს „პირდაპირ გავლენას მოახდენს ჩვენს ურთიერთობაზე“. მათი ასევე განაცხადეს, რომ ძალადობის ყველა აქტი უნდა იქნეს გამოძიებული და დამნაშავეებმა პასუხი უნდა აგონ.
გარდა ამისა, განცხადებაში ნათქვამია, რომ ევროკავშირი მოუთმენლად ელის OSCE/ODIHR-ის საბოლოო ანგარიშის გამოქვეყნებას იმ დარღვევების შესახებ, რომლებიც მოხდა ბოლო საპარლამენტო არჩევნების წინასაარჩევნო პერიოდში და არჩევნების დროს, და ამ ანგარიშში გამოთქმულ რეკომენდაციებს.
„ევროკავშირი მხარს უჭერს ქართველ ხალხს და მის მიერ არჩეულ ევროპულ მომავალს. ევროკავშირის კარი რჩება ღია და საქართველოს დაბრუნება ევროპულ ფასეულობებთან და ევროკავშირში გაწევრიანების გზაზე საქართველოს ხელმძღვანელობის ხელშია“, – ნათქვამია დასკვნის სახით კაია კალასის და მარტა კოსის განცხადებაში.
ევროპული საბჭოს ახალმა პრეზიდენტმა ანტონიო კოსტამ გუშინ X-ზე დაწერა, რომ მას კაია კალასთან ერთად სატელეფონო საუბარი ჰქონდა საქართველოს პრეზიდენტ სალომე ზურაბიშვილთან. „მთავრობის ქმედებები ხალხის ნებას ეწინააღმდეგება,” – თქვა ანტონიო კოსტამ.
დამატებითი ინფორმაცია
ყველაზე წაკითხული
თემაზე
ახალგაზრდა ევროპელი ელჩები ურთიერთობების, შთაგონების და ცვლილების ათწლეულს აღნიშნავენ
ევროკავშირის ინიციატივა, „საქართველო მწვანე მომავლისკენ“, 14 ივნისს თბილისში „შეკეთებისა და ხელახლა გამოყენების დღეს“ მართავს
ევროკომისია ევროკავშირის ინოვაციების პლატფორმას აამოქმედებს
EBRD-მა „ავერსი ფარმას“ 10 მილიონი ევროს ოდენობის სესხი გამოუყო
ევროკავშირისა და გაეროს მხარდაჭერით საქართველო ჰაერის ხარისხის მონიტორინგის ქსელს აფართოებს
ინფორმაცია ამ ვებგვერდზე რეგულირდება პასუხისმგებლობის შეზღუდვის და პერსონალურ მონაცემთა დაცვის დებულებებით. © European Union,
