ევროკავშირი წევრობას არავის აიძულებს, განაცხადა პაველ ჰერჩინსკიმ საქართველოს საგარეო საქმეთა მინისტრთან შეხვედრის შემდეგ

2026 წლის 27 აპრილს ევროკავშირის ელჩი საქართველოში, პაველ ჰერჩინსკი ვიცე-პრემიერთან, საგარეო საქმეთა მინისტრ მაკა ბოჭორიშვილთან შეხვედრაზე იყო მიწვეული. 

„მათ შორის შედგა საფუძვლიანი საუბარი ევროკავშირი-საქართველოს ურთიერთობების შესახებ“, – ვკითხულობთ ევროკავშირის წარმომადგენლობის მიერ შეხვედრის შემდეგ გამოქვეყნებულ პრესრელიზში, – „ევროკავშირი საკუთარი ოჯახის წევრობას არავის აიძულებს. გვსურს, რომ საქართველოს ხელისუფლებამ ხელიდან არ გაუშვას ის ისტორიული შესაძლებლობა, რომელიც ჯერ კიდევ არსებობს“.

ევროკავშირის წარმომადგენლობამ ასევე ხაზი გაუსვა, რომ საქართველოს დამოუკიდებლობის მოპოვებიდან „ევროკავშირი საქართველოს  გვერდში უდგას და ეხმარება დემოკრატიული და წარმატებული სახელმწიფოს მშენებლობაში“.

„როგორც საქართველოს მოქალაქეთა უმრავლესობას, ჩვენც გვჯერა, რომ ევროკავშირის წევრობა ქვეყნისთვის მშვიდობისა და კეთილდღეობის საუკეთესო გარანტიას წარმოადგენს“, – აღნიშნულია პრესრელიზში, – „ევროკავშირში გაწევრიანება მოითხოვს ნამდვილ ერთგულებას და ხელშესახებ რეფორმებს ევროკავშირის ღირებულებებსა და სტანდარტებთან შესაბამისობის მისაღწევად. სამწუხაროდ, საქართველოს ხელისუფლების მიერ არჩეული ამჟამინდელი კურსი ქვეყანას აშორებს ევროკავშირის წევრობის გზას“. 

პრესრელიზში ასევე ვკითხულობთ, რომ ევროკავშირის წინააღმდეგ უწყვეტი და მიზანმიმართული რიტორიკა საქართველოს ევროკავშირისკენ სწრაფვას უფრო მეტად ძარცვავს დამაჯერებლობისგან.

დამატებითი ინფორმაცია

პრესრელიზი