ევროკავშირი 2023 წლის საქმიანობის შემაჯამებელ ანგარიშს აქვეყნებს

ევროკავშირმა გამოაქვეყნა ანგარიში, რომელშიც 2023 წლის საქმიანობის ძირითადი ასპექტებია შეჯამებული. „ევროკავშირი 2023 წელს“ აღწერს მთავარ პოლიტიკურ მოვლენებსა და მათ გავლენას ევროკავშირსა და მის საზღვრებს გარეთ მცხოვრებ ადამიანებზე.

ანგარიშის პირველი თავი ეძღვნება მხარდაჭერას, რომელსაც ევროკავშირი უკრაინას რუსეთის აგრესიის ფონზე აწვდის. 

„უკვე მეორე წელია, ევროპა გაერთიანებული ძალებითა და სიმტკიცით დაუდგა გვერდში უკრაინას“, — განაცხადა ევროკომისიის პრეზიდენტმა, ურსულა ფონ დერ ლაიაენმა ანგარიშის წინასიტყვაობაში, — „ჩვენ გზა გავკვალეთ იმისათვის, რომ ევროკავშირს 4 მილიონზე მეტი უკრაინელი ლტოლვილისთვის ემასპინძლა და ორგანიზება გავუწიეთ მტკიცე ფინანსურ, ჰუმანიტარულ და სამხედრო დახმარებას, რომელიც ამ ეტაპზე 88 მილიარდ ევროზე მეტს შეადგენს. და ჩვენ ვაჩვენეთ, რომ უკრაინის გვერდით ვიდგებით მანამ, სანამ საჭირო იქნება“.

მან ასევე დაურთო, რომ ახალი „უკრაინის მექანიზმის“ მეშვეობით ევროკავშირი მომდევნო ოთხი წლის განმავლობაში დამატებით 50 მილიარდ ევროს გასცემს „საბაზისო სერვისების მიწოდების უზრუნველსაყოფად, რათა სკოლები ღია დარჩეს და ხელფასები და პენსიები გაიცეს, სანამ უკრაინელი ხალხი დამპყრობლის წინააღმდეგ ბრძოლას განაგრძობს“.

ანგარიში ასევე ეხება გასული წლის „ისტორიულ გაფართოების პაკეტს“. კერძოდ, დოკუმენტში აღნიშნულია, რომ 2023 წლის განმავლობაში საქართველომ, მოლდოვამ და უკრაინამ ევროკავშირში გაწევრიანების სურვილისადმი ერთგულება გამოავლინეს. 

„გაწევრიანებისკენ მათი გზა მოიაზრებს სასამართლო სისტემების მიზნობრივ რეფორმებს, ორგანიზებულ დანაშაულთან ბრძოლას და უწყვეტ ძალისხმევას პოლიტიკური ლანდშაფტის გასაუმჯობესებლად — განსაკუთრებით დეოლიგარქიზაციისა და ადამიანის უფლებათა დაცვის მიმართულებებით“. 

აღმოსავლეთ პარტნიორობასთან დაკავშირებით ანგარიშში აღნიშნულია, რომ 17 მილიარდი ევროს ბიუჯეტის მქონე აღმოსავლეთ პარტნიორობის ეკონომიკური და საინვესტიციო გეგმა ევროკავშირისთვის კვლავ რჩება რეგიონში მედეგობის გამაძლიერებელ მთავარ ინსტრუმენტად. 2023 წლის ბოლოსთვის გეგმით გათვალისწინებული ინვესტიციებით მობილიზებული იყო 8.6 მილიარდი ევრო, საიდანაც 5 მილიარდი ცალკეული ქვეყნების საფლაგმანო პროექტებს მოხმარდა. 

დამატებითი ინფორმაცია

პრესრელიზი