EU4Energy საქართველოში, მოლდოვასა და უკრაინაში ენერგეტიკის მართვის გასაუმჯობესებლად სამუშაო პროგრამას წარადგენს 

EU4Energy ინიციატივამ წარადგინა 2024 წლის სამუშაო პროგრამა, რომელშიც საქართველოს, მოლდოვისა და უკრაინის ენერგეტიკის სექტორის მართვის, განვითარებისა და მდგრადობის ხელშესაწყობად კომპლექსური გეგმაა მოცემული.

2024 წელს EU4Energy უწყვეტ მხარდაჭერას გაუწევს ამ სამ ქვეყანას განახლებადი ენერგიის, გაზის ბაზრის განვითარებისა და ენერგოეფექტიანობის სფეროებში, რაც ნახშირბადის ნაკვალევის შემცირებისა და ეკოლოგიურად პასუხისმგებლობიანი ენერგეტიკული პრაქტიკის ხელშეწყობისთვის გადამწყვეტი მნიშვნელობისაა.

EU4Energy ევროკავშირის კანდიდატ სამივე ქვეყანაში სამინისტროების, მარეგულირებლების, გადამცემი სისტემის ოპერატორებისა (TSOs) და სხვა დაინტერესებული მხარეების პოტენციალის განვითარებაზეც გაამახვილებს ყურადღებას.

პროგრამა აქტიურად დაუჭერს მხარს ელექტროენერგიის ინტეგრაციის პაკეტის განხორციელებას, რადგან რეგიონულ ელექტროქსელებში ინტეგრაცია ენერგეტიკულ უსაფრთხოებასა და მდგრადობას აუმჯობესებს.

გარდა საერთო პრიორიტეტებისა, EU4Energy-ის 2024 წლის სამუშაო პროგრამა თითოეულ პარტნიორ ქვეყანაზე ინდივიდუალურად მორგებულ მხარდაჭერასაც ითვალისწინებს. 

საქართველოში ყურადღება გამახვილდება საქართველოს სახელმწიფო ელექტროსისტემის (სსე) და საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) მხარდაჭერაზე. კერძოდ, შემუშავდება ნარჩენი ნარევის გამოთვლის მეთოდოლოგია და წარმოშობის გარანტიების გამჟღავნების წესები.

ევროკავშირის მიერ დაფინანსებული ინიციატივა, EU4Energy მიზნად ისახავს სუფთა ენერგიაზე გადასვლას, ენერგოუსაფრთხოების გაზრდას აღმოსავლეთ პარტნიორობის სამ ქვეყანაში (საქართველოში, მოლდოვასა და უკრაინაში) და უკრაინის მოსახლეობისთვის ენერგიაზე წვდომის გაუმჯობესებას ომის ზეგავლენის შესამცირებლად.

დამატებითი ინფორმაცია

პრესრელიზი