EU4Energy საქართველოს განახლებადი წყაროებიდან მიღებული ელექტროენერგიის წარმოშობის სერტიფიკატებისთვის წესების შემუშავებაში დაეხმარება

17 სექტემბერს ენერგეტიკული თანამეგობრობის ექსპერტებმა საქართველოში EU4Energy-ს ტექნიკური დახმარების პროგრამა დაიწყეს. ინიციატივა საქართველოს ეკონომიკის სამინისტროსთან, საქართველოს ენერგეტიკისა და წყალმომარაგების მარეგულირებელ ეროვნულ კომისიასთან (GNERC) და „საქართველოს სახელმწიფო ელექტროსისტემასთან“ თანამშრომლობით განხორციელდება. მისი მიზანი  განახლებადი წყაროებიდან წარმოებული ელექტროენერგიის წარმოშობის სერტიფიკატების გაცემის ისეთი წესების შემუშავებაა, რომლებიც საუკეთესო ევროპულ პრაქტიკას შეესაბამება. 

განახლებადი წყაროებიდან ენერგიის წარმოებისა და გამოყენების წახალისების შესახებ საქართველოს კანონის მიხედვით, საქართველოს ენერგეტიკისა და წყალმომარაგების მარეგულირებელი ეროვნული კომისია სერტიფიკატების გაცემის წესებს 2021 წლის ბოლომდე დაამტკიცებს. ამის შემდეგ  „საქართველოს სახელმწიფო ელექტროსისტემა“ შექმნის რეესტრს და განახლებადი წყაროებიდან მიღებული ელექტროენერგიის წარმოშობის სერტიფიკატებს შესაბამისი მწარმოებლის მოთხოვნის საფუძველზე გასცემს. 

გარდა ამისა, საქართველომ გამოხატა ინტერესი, შეუერთდეს ენერგეტიკული თანამეგობრობის რეგიონულ ინიციატივას. ეს უკანასკნელი ისეთი ელექტრონული სისტემების შექმნას ისახავს მიზნად, რომლის მეშვეობითაც ელექტროენერგიის წარმოშობის სერტიფიკატების გაცემა, გადაცემა და გაუქმებაა შესაძლებელი. 

წესების პირველ ვერსიას ენერგეტიკული თანამეგობრობის სამდივნოს ექსპერტები 2021 წლის ოქტომბრის შუა რიცხვებამდე შეიმუშავებენ.

დამატებითი ინფორმაცია

პრესრელიზი