EU4Dialogue: ორგანიზაციის, „ხელები მშვიდობისთვის“, პროექტის ფარგლებში შექმნილი ნამუშევრები ზუგდიდში გამოიფინა

ქალთა არასამთავრობო ორგანიზაციამ, „ხელები მშვიდობისთვის“, ზუგდიდში გალა-წარმოდგენას უმასპინძლა. ღონისძიებაზე პროექტის, „ხელნაკეთი ნივთები სოციალური ცვლილებისთვის“, ფარგლებში შექმნილი ნამუშევრები გამოიფინა. პროექტი ევროკავშირისა და გაეროს განვითარების პროგრამის (UNDP) მხარდაჭერით მოქმედი ინიციატივის, EU4Dialogue-ის ფარგლებში განხორციელდა.

ინიციატივის შედეგად, კონფლიქტით დაზარალებულმა 40-მა ქალმა ჭრა-კერვის, ქარგვის, ქსოვის და მაკრამეს ძაფით ქსოვის შესასწავლი კურსები გაიარა. ტრენინგზე შეძენილი პროფესიული ცოდნა მათ დასაქმებაში და ცხოვრების პირობების გაუმჯობესებაში დაეხმარება. ტრენინგის ექვსი მონაწილე უკვე დასაქმდა სხვადასხვა ადგილობრივ საწარმოში, ხოლო ერთმა ბენეფიციარმა სამეწარმეო საქმიანობისთვის გრანტის მოპოვება შეძლო.

დამატებით, „ხელები მშვიდობისთვის“ ქალებს მარკეტინგთან, გაყიდვებთან და სოციალური მედიის გამოყენებასთან დაკავშირებული უნარების შეძენაში დაეხმარა. მათ ასევე ისწავლეს ბიზნესგეგმის შედგენა და საგრანტო განაცხადების შევსება.

კონფლიქტით დაზარალებულ საზოგადოებაში სოციალური ერთიანობის განსამტკიცებლად, პროექტში ჩართულები იყვნენ როგორც დევნილები, ასევე მკვიდრი მოსახლეობა. ტრენინგის 40 მონაწილიდან 15 ქალი აფხაზეთიდან დევნილი იყო, ხოლო დანარჩენები ზუგდიდის, წალენჯიხის და ხობის მუნიციპალიტეტებში მცხოვრებნი გახლდნენ. 

EU4Dialogue: კონფლიქტის ტრანსფორმაციის მხარდაჭერა სამხრეთ კავკასიასა და მოლდოვის რესპუბლიკაში ევროკავშირის და UNDP-ის ერთობლივი ინიციატივაა. ის მიზნად ისახავს ადამიანების სოციალურ-ეკონომიკური მდგომარეობის გაუმჯობესებას, გენდერული თანასწორობისა და ახალგაზრდობის ჩართულობის მხარდაჭერას და კონფლიქტის გარდაქმნის ხელშეწყობას.

დამატებითი ინფორმაცია

პრესრელიზი