ENPARD-ის ათი წელი საქართველოში: სოფლის განვითარება და 2,600-ზე მეტი სამუშაო ადგილი 

ევროკავშირის მიერ დაფინანსებულმა სოფლისა და სოფლის მეურნეობის განვითარების ევროპის სამეზობლო პროგრამამ (ENPARD), რომლის მთლიანი ბიუჯეტი 234,5 მილიონი ევროა, საქართველოში საკუთარი 10-წლიანი საქმიანობის შედეგები შეაჯამა. 

პროგრამა 2013 წლიდან უჭერს მხარს ქვეყნის ინსტიტუციური, საკანონმდებლო და ადმინისტრაციული სისტემების ევროკავშირის სტანდარტებთან შესაბამისობაში მოყვანას. ამასთან, ის საქართველოში სოფლის განვითარების ევროპული მოდელების დანერგვასაც უწყობს ხელს.

თბილისში გამართულ დასკვნით კონფერენციაზე ENPARD-ის მესამე ფაზის შემდეგი წარმატებები გაშუქდა:  

• ENPARD-ის სამიზნე რეგიონებში შეიქმნა ან შენარჩუნდა 2,600-ზე მეტი სამუშაო ადგილი, რომელთა უმეტესობაზე (1,700) ქალები დასაქმდნენ; 
• სოფლად მცხოვრები 7000-მდე ქალი და კაცი ჩაერთო უნარების განვითარების და პროფესიული განათლებისა და გადამზადების პროგრამებში;
• ადგილობრივი განვითარების ჯგუფები (LAG), რომლებიც ENPARD-ის მესამე ფაზის ფარგლებში შეიქმნა, იმართება ქალებითა და კაცებით თანაბრად დაკომპლექტებული საბჭოების მიერ. ეს გარემოება ადგილობრივი განვითარების საკითხებზე სტრატეგიული გადაწყვეტილებების მიღების პროცესში ქალებისა და კაცების ერთობლივ მონაწილეობას უწყობს ხელს. 

„სოფლის განვითარება ევროკავშირისა და საქართველოს თანამშრომლობის მნიშვნელოვანი სფეროა. სოფლის მდგრადი, ინკლუზიური და მწვანე ეკონომიკა ხელს უწყობს სიღარიბის აღმოფხვრას, ქმნის სამუშაო ადგილებს და სახავს მდგრადი ზრდის გზას ადამიანებისა და გარემოს საკეთილდღეოდ“, — განაცხადა ევროკავშირის ელჩმა საქართველოში, პაველ ჰერჩინსკიმ.

დამატებითი ინფორმაცია

პრესრელიზი