წინანდალი აღმოსავლეთ პარტნიორობის ქალაქებს შორის თანამშრომლობის თემაზე EU4Culture-ის კონფერენციას მასპინძლობს 

5-6 ოქტომბერს წინანდალში ევროკავშირის მიერ დაფინანსებულმა პროექტმა, EU4Culture, „რეგიონული ქსელის მესამე კონფერენცია“ გამართა. კონფერენცია მიეძღვნა „EU4Culture-ის ქალაქების ქსელს“, რომელიც აზერბაიჯანის, მოლდოვის რესპუბლიკის, საქართველოს, სომხეთისა და უკრაინის 14 ქალაქს აერთიანებს. 

EU4Culture-ის ფარგლებში, 14-მა ქალაქმა, რომელთაც არ აქვთ დედაქალაქის სტატუსი, კულტურის განვითარების სტრატეგია „ევროპის კულტურული დედაქალაქების“ მიდგომის შესაბამისად შეიმუშავა. მათგან რვას დაგეგმილი აქტივობების შესასრულებლად 300 000 ევრომდე ოდენობის გრანტები გამოეყო. „EU4Culture-ის ქალაქების ქსელის“ მეშვეობით, პროექტი  ხელს უწყობს აზერბაიჯანის, მოლდოვის რესპუბლიკის, საქართველოს, სომხეთისა და უკრაინის ქალაქებს შორის თანამშრომლობას, რასაც ყოველწლიური „ქსელის კონფერენციები“ განამტკიცებს.

კონფერენციაზე ქალაქების მერებმა და სხვა წარმომადგენლებმა, პროექტის პარტნიორებმა და საერთაშორისო ექსპერტებმა მოიყარეს თავი. მათ ქსელის განვითარების შესახებ ისაუბრეს და თანამშრომლობის შესაძლებლობები განიხილეს.

ამას გარდა, ქალაქებმა წარმოადგინეს თავიანთი პროგრესი და ერთმანეთს კულტურის განვითარების სტრატეგიების განხორციელებისას მიღებული გამოცდილება გაუზიარეს.

კონფერენციაზე ასევე გამოვლინდა კულტურის სფეროს პროექტები, რომლებიც EU4Culture-ის საგრანტო სქემით დაფინანსდება. პროექტები აღმოსავლეთ პარტნიორობის ქვეყნების იმ ქალაქებში განხორციელდება, რომელთაც დედაქალაქის სტატუსი არ აქვთ. 

კონფერენციის მეორე დღე ტურიზმის მეშვეობით მდგრადი ეკონომიკური განვითარების საკითხში კულტურის პოლიტიკის როლის განხილვას დაეთმო. 

„მდგრადი კულტურული ტურიზმი ძლიერი იარაღია იმ პოტენციალის გასაფართოებლად, რომელიც კულტურას ეკონომიკური განვითარებისა და ადგილობრივი თემების კეთილდღეობის გაუმჯობესების კუთხით აქვს“, — აღნიშნა ქრისტოფ მასონმა, ევროკომისიის DG NEAR-ის „ინკლუზიური საზოგადოებების“ გუნდის ლიდერმა, — „კულტურის განვითარების ევროკავშირისეული ხედვა EU4Culture-ის მსგავს იმ პროექტებში აისახება, რომლებიც რეგიონულ თანამშრომლობას უწყობს ხელს და ჩვენი მრავალფეროვანი კულტურების ტრანსფორმაციულ ეკონომიკურ და სოციალურ პოტენციალს ავლენს“.

ევროკავშირის მიერ დაფინანსებული პროგრამა, EU4Culture, მიზნად ისახავს, მხარი დაუჭიროს კულტურას, როგორც ზრდისა და სოციალური განვითარების იარაღს, აღმოსავლეთ პარტნიორობის ქვეყნებში. პროექტს ახორციელებენ გოეთეს ინსტიტუტი (ხელმძღვანელი), საქართველოს ფრანგული ინსტიტუტი (Institut Francais Géorgie), დანიის კულტურის ინსტიტუტი და ჩეხეთის ცენტრები.

დამატებითი ინფორმაცია

EU4Culture-ის ქალაქების ქსელი 

EU4Culture-ის საგრანტო კონკურსი