აღმოსავლეთ პარტნიორობის მერები ბათუმში მომავლის ქალაქებზე სამსჯელოდ შეიკრიბნენ

4-5 ოქტომბერს ბათუმში გამართულ ორდღიან ურბანულ ფორუმზე აღმოსავლეთ პარტნიორობის 200-ზე მეტი წარმომადგენელი შეიკრიბა. ფორუმის ორგანიზატორები იყვნენ ევროკომისიის გენერალური დირექტორატი სამეზობლო პოლიტიკისა და გაფართოებაზე მოლაპარაკებების საკითხებში (DG NEAR), გაეროს განვითარების პროგრამა (UNDP) და პარტნიორი ორგანიზაციები. 

ფორუმის, მომავლის ქალაქები/Future-Fit Cities, მონაწილეებმა განიხილეს, თუ როგორ შეიძლება გადაიჭრას კომპლექსური მუნიციპალური საკითხები მწვანე, ინკლუზიური და მედეგი ქალაქების განვითარებით და რა შესაძლებლობებს ქმნის კერძო-საჯარო ფინანსირება ქალაქების მდგრადი ზრდისა და ინოვაციების მიმართულებით. 

დისკუსია შეეხო ისეთ მნიშვნელოვან საკითხებს, როგორიცაა ხელმძღვანელობის გამოწვევები და ფინანსური მდგრადობა. მონაწილეებს, რომელთა შორისაც აღმოსავლეთ პარტნიორობის მერებიც იყვნენ, შესაძლებლობა მიეცათ, გაეღრმავებინათ ცოდნა და გაეფართოებინათ პარტნიორთა ქსელი ინიციატივის, „მერები ეკონომიკური ზრდისთვის“ (M4EG), ფარგლებსა და მის მიღმაც. 

UNDP-ის სტამბოლის რეგიონული ცენტრის ცოდნისა და ინოვაციების გუნდის ხელმძღვანელმა, ლეილა სადიკუმ ფორუმზე აღნიშნა, რომ ქალაქები მსოფლიოს კეთილდღეობის მამოძრავებელ ძალას წარმოადგენს. მაგრამ, ამავდროულად, ისინი გლობალური რესურსების 75%-ს მოიხმარენ და სათბური აირების გამოფრქვევის 60-80%-ზე აგებენ პასუხს. 

M4EG მექანიზმი „მერები ეკონომიკური ზრდისთვის“ ინიციატივას ეფუძნება, რომელიც 2017 წლიდან ევროკავშირის დაფინანსებით ხორციელდება. M4EG მექანიზმს 2021 წლიდან ხელმძღვანელობს UNDP, რა მიზნითაც ის მჭიდროდ თანამშრომლობს ევროკავშირთან, ადგილობრივ ხელისუფლებებთან და სხვა პარტნიორებთან.

დამატებითი ინფორმაცია

პრესრელიზი