აღმოსავლეთ პარტნიორობის ქალაქები მუნიციპალური განვითარების ახალ გზებს სახავენ 

28 ივლისს აღმოსავლეთ პარტნიორობის ქვეყნების 300 მუნიციპალიტეტისა და ადგილობრივი თვითმმართველობის ერთეულის წარმომადგენელთა მონაწილეობით რეგიონული შეხვედრა, მაჩვენე & მიამბე (Show&Tell) გაიმართა. დამსწრეებმა განიხილეს გზები, რომლებითაც რეგიონის წინაშე მდგარი გამოწვევების გადაჭრა და მდგრადი სისტემების დანერგვისა და შემოსავლის ახალი წყაროების შექმნის შესახებ ცოდნის გაზიარებაა შესაძლებელი. 

ქუთაისში გამართულ შეხვედრაში ის მუნიციპალიტეტები მონაწილეობდნენ, რომლებიც პროგრამაში, „მერები ეკონომიკური ზრდისთვის“ (M4EG), არიან გაერთიანებულები. ევროკავშირის მიერ დაფინანსებულ ამ ინიციატივას გაეროს განვითარების პროგრამა (UNDP) აზერბაიჯანში, მოლდოვის რესპუბლიკაში, საქართველოში, სომხეთსა და უკრაინაში ახორციელებს.

შეხვედრას ფიზიკურად M4EG ქსელში გაერთიანებული 56 მუნიციპალიტეტისა და ადგილობრივი თვითმმართველობის ერთეულის წარმომადგენლები დაესწრნენ. ხოლო აზერბაიჯანის, მოლდოვის რესპუბლიკის, სომხეთისა და უკრაინის წარმომადგენლები ღონისძიებაში ონლაინ რეჟიმში ჩაერთნენ.

მაჩვენე & მიამბეს მონაწილეებმა ერთმანეთს საკუთარი გამოცდილებები გაუზიარეს. შეხვედრის მსვლელობისას ცამეტმა მუნიციპალიტეტმა საგრანტო პროგრამებით მხარდაჭერილი ორი ინოვაციური მიდგომის, „მუნიციპალური გარდაქმნის პორტფელებისა“ და „ურბანული ხედვის“ დანერგვის საქმეში თავისი საქმიანობის მიმდინარე შედეგები წარადგინა. ამ საგრანტო პროგრამათა მიზანი იმ ინიციატივების დახმარებაა, რომლებიც ადგილობრივი ცხოვრების ძირითადი ასპექტების გარდაქმნასა და განახლებას ცდილობენ.

შეხვედრაზე საკუთარი გამოცდილება არაერთმა ქალაქმა წარმოადგინა. მათ შორის იყვნენ: სომხეთის ქალაქი არენი, რომელიც მდგრად ტურიზმზე ორიენტირდება; ბათუმი, რომელიც სტარტაპების ისეთ ეკოსისტემას აყალიბებს, როგორიც განახლებული ურბანული იდენტობისა და სამეწარმეო კულტურის შექმნას უწყობს ხელს; ქუთაისი, რომელიც ნერგავს ჭკვიანი ეკო-ქალაქის მოდელს, რათა ბუნებაზე დამყარებული ურბანული ინოვაციის გამოყენებით მუნიციპალიტეტი მეტად ეკომეგობრული გახადოს; მოლდოვის ქალაქი ჩადირ-ლუნგა, რომელიც მუნიციპალიტეტში ენერგოეფექტიანობას აუმჯობესებს და ენერგიის მიწოდების ხელმისაწვდომ სისტემას ქმნის. 

„ურბანული ხედვის“ პროგრამაში ჩართულმა ცხრა მუნიციპალიტეტმა რეგიონულ შეხვედრაზე თავიანთ საქმიანობაზე ისაუბრეს. მათ ეკონომიკური განვითარების, ინფრასტრუქტურის, საზოგადოებრივი ტრანსპორტისა და ნარჩენების მართვის მხრივ მიღწეული შედეგები წარადგინეს. ამასთან, უკრაინის ქალაქების ასოციაციის წარმომადგენლებმა ისაუბრეს იმაზე, თუ როგორ მართავენ ქალაქებს ომის ფონზე განვითარებული კრიზისის პირობებში.

„ეკონომიკურ პრობლემებთან და კლიმატის ცვლილებასთან დაკავშირებულ გამოწვევებთან ერთად, რეგიონის ბევრი ქალაქი უკრაინაში მიმდინარე ომის შედეგად განვითარებულ ჰუმანიტარულ და ლტოლვილთა კრიზისსაც უმკლავდება. ინოვაციური გადაწყვეტები ამ ქალაქებს დაეხმარება, მოაგვარონ მიმდინარე გამოწვევები ისე, რომ მმართველობის სისტემებმა შეუფერხებლად განაგრძონ მუშაობა“, — აღნიშნა საქართველოში ევროკავშირის წარმომადგენლობის მმართველობისა და ადამიანური კაპიტალის მიმართულების ხელმძღვანელმა, კოლომბ დე მერსიმ.

ევროკავშირის მიერ დაფინანსებული ინიციატივა, „მერები ეკონომიკური ზრდისთვის“ (M4EG), 2017 წლიდან მიმდინარეობს. გაეროს განვითარების პროგრამა (UNDP) მას 2021 წლიდან მოყოლებული ევროკავშირთან, ადგილობრივ ხელისუფლებებთან და სხვა პარტნიორებთან მჭიდრო თანამშრომლობის პირობებში ახორციელებს. 

დამატებითი ინფორმაცია

პრესრელიზი