ՎԶԵԲ-ը 2026-ին եւ 2027-ին Հայաստանի ՀՆԱ 5,5% աճ է կանխատեսում

Հայաստանը 2025 թվականին շարունակել է գրանցել արագ աճ՝ պայմանավորված շինարարության, տեղեկատվական եւ հաղորդակցական տեխնոլոգիաների (ՏՀՏ) եւ ֆինանսական ծառայությունների ոլորտներում բարձր տեմպով։ Այս մասին ասվում է հունիսի 3-ին հրապարակված «Տնտեսական հեռանկարները ՎԶԵԲ-ի գործառնությունների տարածաշրջաններում» զեկույցում։

2025 թվականին Հայաստանում իրական ՀՆԱ-ն աճել է 7,2%-ով, ընդ որում՝ նման բարձր տեմպը պայմանավորված է եղել շինարարության, ՏՀՏ եւ ֆինանսական ծառայությունների ոլորտներով, որոնցից յուրաքանչյուրը արձանագրել է երկնիշ աճի տեմպեր։

Տեմպը պահպանվել է նաեւ 2026 թվականին՝ I եռամսյակում տարեկան կտրվածքով գրանցելով 7,1% աճ։ Տարեկան գնաճը, որը 2025-ին կազմել էր 3,3%, 2026թ. ապրիլին բարձրացել է մինչեւ 5,3%՝ գերազանցելով 3% թիրախային շեմը։ Բյուջեի դեֆիցիտի հարաբերակցությունը ՀՆԱ-ին 2025 թվականի համար պահպանվել է 3,7% մակարդակում, մինչդեռ պետական պարտքը տարեվերջին կայունացել է ՀՆԱ-ի 49,5% նշագծին։

Հայկական դրամը հիմնականում մնացել է կայուն՝ չնայած նրան, որ ընթացիկ հաշվի դեֆիցիտը 2024թ. ՀՆԱ-ի 4,6%-ից 2025թ. ավելացել է մինչեւ ՀՆԱ-ի 7,2%՝ թանկարժեք քարերի եւ մետաղների առեւտրի զգալի կրճատման պատճառով:

Զեկույցի համաձայն, 2026 թվականի ապրիլին Հայաստանի համախառն միջազգային պահուստներն աճել են մինչեւ 5,7 միլիարդ դոլար՝ նախորդ տարվա 3,9 միլիարդ դոլարի համեմատ՝ ապահովելով ներմուծման չորս ամսվա ծածկույթ։

Ըստ ՎԶԵԲ-ի կանխատեսման՝ 2026 եւ 2027 թվականներին Հայաստանի տնտեսական աճի 5,5% պոտենցիալը կապված է Թուրքիայի հետ սահմանի հնարավոր բացման, TRIPP («Թրամփի երթուղին միջազգային խաղաղության եւ բարգավաճման համար») պլանի իրականացման եւ ԵՄ-ի հետ համագործակցության ընդլայնման հետ։ Սակայն Մերձավոր Արեւելքի հակամարտության տնտեսական հետեւանքները կարող են վատթարացնել աճի հեռանկարները՝ հումքային ապրանքների ներմուծման թանկացման, զբոսաշրջային հոսքերի կրճատման, ինչպես նաեւ առեւտրի եւ լոգիստիկայի բարդացման պատճառով։

Իմացիր ավելին

Մամուլի հաղորդագրություն