Լաչինի միջանցքի հարցով ՄԱԿ-ի Անվտանգության խորհրդի նիստ. ԵՄ ներկայացուցիչը հայտարարել է, որ մարդասիրական հասանելիությունը չպետք է քաղաքականացվի որեւէ դերակատարի կողմից

ՄԱԿ-ում ԵՄ պատվիրակության ղեկավարի տեղակալ Սիլվիո Գոնզատոն օգոստոսի 16-ին Նյու Յորքում կայացած ՄԱԿ-ի Անվտանգության խորհրդի արտահերթ նիստում հայտարարել է, որ Եվրոպական միությունը խորապես անհանգստացած է «լուրջ հումանիտար իրավիճակով, որին բախվել է նախկին Լեռնային Ղարաբաղի ինքնավար մարզի բնակչությանը»։

Նիստը գումարվել էր Հայաստանի Հանրապետության խնդրանքով։

«Լաչինի միջանցքով տեղաշարժը խոչընդոտված է ավելի քան 8 ամիս, չնայած Արդարադատության միջազգային դատարանի՝ այն բացելու որոշման: Հունիսի 15-ից  միջանցքի խաթարումը լիարժեք է, բացառությամբ բժշկական նպատակով տարհանումների համար: Բնակչությունը ծայրահեղ պահանջ ունի անհրաժեշտ նյութերի ու պարագաների եւ սա լուրջ հետեւանքների կարող է հանգեցնել տեղի բնակչության համար»,- ասել է Գոնզատոն:

Նա հավելել է, որ ԵՄ-ն ափսոսանք է հայտնում, որ տարածաշրջանում ԿԽՄԿ-ի գործունեությունը լրջորեն տուժել է, եւ այն ամբողջությամբ վերականգնելու կոչ է անում՝ ներառյալ բժշկական տարհանումները եւ մարդասիրական մատակարարումները:

«Մարդասիրական հասանելիությունը չպետք է քաղաքականացվի որեւէ դերակատարի կողմից»,- հայտարարել է ԵՄ ներկայացուցիչը։

Գոնզատոն նաեւ նշել է, որ Հայաստանում ԵՄ դիտորդական առաքելությունը (ԵՄԴԱ) պարեկություն է իրականացնում Ադրբեջանի հետ միջազգային սահմանի հայկական կողմի երկայնքով՝ դիտարկելու եւ զեկուցելու իրավիճակը, ինչպես նաեւ նպաստելու Հայաստանի եւ Ադրբեջանի միջեւ հակամարտության կարգավորմանն ու վստահության ամրապնդմանը:

Հարկ է նշել, որ Եվրոպական միությունը, մասնավորապես՝ Եվրոպական խորհրդի նախագահ Շառլ Միշելը, 2021 թվականի վերջից զբաղվում է Հայաստանի եւ Ադրբեջանի միջեւ հարաբերությունների կարգավորման գործընթացի աջակցությամբ։

Իմացիր ավելին

Մամուլի հաղորդագրություն