Հայաստանը գործարկում է ԵՄ աջակցությամբ ստեղծված ռեեստրը՝ կլիմայական գործողություններն արագացնելու համար
Հայաստանը պաշտոնապես գործարկել է իր Ջերմոցային գազերի արտանետումների նոր ռեգիստրը եւ Չափման, հաշվետվայնության ու հավաստագրման (ՉՀՀ/MRV) հարթակը։
Շրջակա միջավայրի նախարարության կողմից ս.թ. մայիսի 14-ին մեկնարկած այս թվային նախաձեռնությունը նպատակ ունի կտրուկ բարելավել արտանետումների հետագծումը՝ ապահովելով երկրի ընթացքը Փարիզյան համաձայնագրով ստանձնած պարտավորությունների կատարման ուղղությամբ։
ՉՀՀ նոր հարթակը մշակվել է EU4ClimateResilience (ProGress) ծրագրի շրջանակում։ Տվյալահեն եւ փաստարկված հետագծման շնորհիվ հարթակը ծառայում է որպես հիմնարար գործիք Հայաստանի հավակնոտ նպատակի համար, այն է՝ մինչեւ 2035 թվականը նվազեցնել ջերմոցային գազերի արտանետումները 44%-ով՝ որպես Ազգային մակարդակով սահմանված գործողությունների (ԱՄՍԳ 3.0/NDC 3.0) շրջանակի մաս։
Գործարկումից հետո նախարարությունը կլոր սեղան-քննարկում անցկացրեց միջազգային զարգացման հիմնական գործընկերների, այդ թվում՝ Հայաստանում ԵՄ պատվիրակության մասնակցությամբ։ Հանդիպումը կենտրոնացած էր Հայաստանի հրատապ տեխնիկական եւ ֆինանսական կարիքների հստակեցման վրա՝ ապահովելով միջազգային բոլոր ջանքերի սերտ համակարգումը երկրի կլիմայական նպատակների իրագործումն արագացնելու համար։
«Ստեղծելով ստուգելի տվյալների հիմք՝ Հայաստանը կլիմայական խոստումներից անցում է կատարում չափելի ու հաշվետու կլիմայական գործողությունների՝ ճանապարհ հարթելով դեպի առավել դիմակայուն եւ կայուն տնտեսություն», — ասվում է Հայաստանում ԵՄ պատվիրակության տարածած մամուլի հաղորդագրության մեջ։
«ԵՄ-ն հանուն կլիմայի դիմակայունության» ծրագիրը բազմադոնոր գործողություն է, որն աջակցում է Արեւելյան գործընկերության (ԱլԳ) երկրների կանաչ անցմանը, նպաստում դեկարբոնիզացման, էներգետիկ անվտանգության եւ կլիմայի փոփոխության հանդեպ դիմակայունության բարձրացման միջոցառումներին: Ծրագիրը համաֆինանսավորվում է Եվրոպական միության եւ Գերմանիայի շրջակա միջավայրի, բնության պահպանության, միջուկային անվտանգության եւ սպառողների պաշտպանության դաշնային նախարարության (BMUV) կողմից, եւ համատեղ իրականացվում է Գերմանիայի միջազգային համագործակցության ընկերության (GIZ) ու Տնտեսական համագործակցության եւ զարգացման կազմակերպության (ՏՀԶԿ/OECD) կողմից։
Իմացիր ավելին
ԱՄԵՆԱԿԱՐԴԱՑԱԾ
ԱՌՆՉՎՈՂ ԹԵՄԱՆԵՐ
YEA10. Երիտասարդ եվրոպական դեսպանները տոնում են կապի, ոգեշնչման եւ փոփոխությունների տասնամյակը
ՎԶԵԲ-ը, ԵՄ-ն եւ ԱրմՍվիսԲանկն աջակցում են Հայաստանում փախստականներին եւ երիտասարդներին
Հայաստան. ԵՄ խորհուրդը նշանակել է Եվրոպական միության գործընկերության առաքելության ղեկավար
Եվրոպական միություն. «Մենք ակնկալում ենք շարունակել մեր սերտ համագործակցությունը Հայաստանի ապագա կառավարության եւ խորհրդարանի հետ»
ԵՄ բարձրաստիճան պաշտոնյաները շնորհավորել են Նիկոլ Փաշինյանին՝ խորհրդարանական ընտրություններում հաղթանակի առթիվ
Սույն կայքում առկա տեղեկատվությունը կարգավորվում է պատասխանատվության սահմանափակման և անձնական տվյալների պաշտպանության մասին դրույթներով:
© European Union,
