Մարթա Կոս. «Երբ գնում եք սուպերմարկետ, փնտրե՛ք հայկական ծիրան, սալոր կամ բալ»

Եվրոպական հանձնաժողովի ընդլայնման հարցերով հանձնակատար Մարթա Կոսը Facebook-ի իր լսարանին կոչ է արել աջակցել Հայաստանին՝ գնելով Ռուսաստանի կողմից այժմ արգելված մրգերը։

«Երբ գնում եք սուպերմարկետ, փնտրե՛ք հայկական ծիրան, սալոր կամ բալ։ Սա հնարավորություն է անելու մի փոքրիկ քայլ, որը կարող է օգնել հայ ֆերմերներին եւ աջակցել նրանց երկրի ժողովրդավարական ընտրությանը», — գրել է նա Facebook-ի իր էջում։

«Ծիրանը խորհրդանշում է այն փոփոխությունները, որոնք տեղի են ունենում Հայաստանում։ Անցյալ ամիս կայացած ընտրություններում հայերի մեծամասնությունը քվեարկեց այն կուսակցությունների օգտին, որոնք ցանկանում են ավելի սերտ գործընկերություն հաստատել ԵՄ-ի հետ։ Ռուսաստանը փորձել էր ազդել քվեարկության վրա՝ սահմանափակելով հայկական մրգերի եւ ծաղիկների ներմուծումը։ Ի պատասխան՝ ԵՄ-ն օգնեց Հայաստանին՝ բացելով իր շուկան այս ապրանքներից շատերի համար», — գրել է Մարթա Կոսը Facebook-ում։

Եվրահանձնակատարը նաեւ հրապարակել է հայկական ծիրանից պատրաստած ջեմի լուսանկարներ։

Նա նաեւ գրել է, որ, Հայաստան իր վերջին այցից հետո ինքը Բրյուսել է վերադարձել ծիրանի հսկայական զամբյուղով։ 

«Դրանց մեծ մասը բաժին հասավ ընկերներիս։ Մնացածից ես ջեմ պատրաստեցի։ Մի ընկեր տեսավ ջեմը ու ասաց. «Ազատության տարաներ»։ Իմ կարծիքով՝ դա արտահայտվելու գեղեցիկ ձեւ էր», — նշել է Մարթա Կոսը։

Իմացիր ավելին

Մարթա Կոսի գրառումը Facebook-ում