ԵՆԲ խումբը եւ Ինեկոբանկն ամրապնդում են աջակցությունը հայկական բիզնեսներին՝ ԵՄ երաշխիքի միջոցով

Եվրոպական ներդրումային բանկը (ԵՆԲ) եւ Եվրոպական ներդրումային ֆոնդը (ԵՆՖ) (համատեղ՝ ԵՆԲ խումբ) ս.թ. նոյեմբերի 25-ին հայտարարեցին Ինեկոբանկի հետ ուժերը միավորելու եւ հայաստանյան միկրո, փոքր եւ միջին ձեռնարկատերերի (ՄՓՄՁ) համար ֆինանսավորման հասանելիությունն ընդլայնելու մասին։

ԵՆԲ խումբն Ինեկոբանկին կտրամադրի 30 միլիոն եվրոյի պորտֆելի մասնակի երաշխիք «EU4Business» երաշխիքային գործիքի շրջանակում, որը Եվրոպական միության կողմից ֆինանսավորվող ծրագիր է եւ նպատակ ունի խթանել մասնավոր հատվածի զարգացումն ընտրված Արեւելյան գործընկերության երկրներում։

ԵՆԲ փոխնախագահ Թերեզա Չերվինսկան, ով վերահսկում է Բանկի գործունեությունը Հայաստանում, նշել է. «Այս երաշխիքով աջակցվող յուրաքանչյուր վարկի հետեւում կանգնած է փոքր բիզնեսի սեփականատեր, որը փորձում է թիմը համախմբված պահել, սարքավորումներ գնել կամ նոր շուկաներ ընդլայնվել։ Ինեկոբանկի եւ Եվրոպական միության հետ համագործակցելով՝ մենք համոզվում ենք, որ ֆինանսավորման հասանելիությունը խոչընդոտ չէ, այլ կամուրջ, որը նպաստում է աշխատատեղերի պահպանմանը եւ ամրապնդում Հայաստանի տնտեսական դիմակայունությունը»։

Նոր երաշխիքը հնարավորություն կտա Ինեկոբանկին ավելի մատչելի ֆինանսավորում առաջարկել հայկական ՄՓՄՁ-ներին՝ նվազեցնելով գրավային պահանջները եւ տոկոսադրույքները։ 

Երաշխիքը կծածկի ՄՓՄՁ-ների անհատական վարկերի մինչեւ 80%-ը, իսկ համախառն հնարավոր վնասները կսահմանափակվեն պորտֆելի 25%-ով։ Այս ռիսկերի բաշխման մեխանիզմը, ըստ գնահատականների, կաջակցի մոտ 120 ձեռնարկության եւ կնպաստի մոտ 1800 աշխատատեղի պահպանմանը Հայաստանի ողջ տարածքում։

Իմացիր ավելին

Մամուլի հաղորդագրություն