ԵՆԲ Գլոբալը 236 միլիոն եվրոյի վարկային համաձայնագիր է ստորագրել Հայաստանի հետ՝ Սիսիան-Քաջարան ճանապարհահատվածի շինարարությունը ֆինանսավորելու համար

Եվրոպական ներդրումային բանկի համաշխարհային ստորաբաժանումը (ԵՆԲ Գլոբալ) Հայաստանի հետ ստորագրել է շուրջ 236 միլիոն եվրոյի վարկային համաձայնագիր՝ «Հյուսիս-Հարավ» ճանապարհային միջանցքի կարեւորագույն՝ Սիսիան-Քաջարան ճանապարհահատվածի շինարարությունը համաֆինանսավորելու համար։

«Այս փոխակերպիչ ծրագիրը կդառնա տարածաշրջանի տրանսպորտային ցանցի հիմնական զարկերակը, որը Հայաստանին կապահովի դեպի գլոբալ շուկաներ ավելի լավ հասանելիությամբ եւ կօգնի ձեւավորել ավելի փոխկապակցված եւ դիմակայուն ապագա։ Սա ԵՆԲ-ի եւ Հայաստանի միջեւ երբեւէ ամենախոշոր ֆինանսական պայմանագիրն է», — նշել է ԵՆԲ-ի փոխնախագահ, Հայաստանում բանկի գործունեության պատասխանատու Թերեզա Չերվինսկան։

Որպես ԵՄ «Գլոբալ դարպասներ» (Global Gateway) նախաձեռնության եւ Արեւելյան գործընկերության համար ԵՄ տնտեսական եւ ներդրումային ծրագրի դրոշակակիր նախագիծ՝ Սիսիան-Քաջարան ճանապարհահատվածի շինարարությունը կնպաստի տնտեսական աճին, տարածաշրջանային անվտանգությանը եւ շրջակա միջավայրի կայունությանը:

«Այս նախագիծը կոչված է փոխելու իրերի դրությունը Հայաստանի եւ Հարավային Կովկասի տարածաշրջանի համար՝ զգալիորեն բարելավելով տրանսպորտային կապը Եվրոպական միության, Մերձավոր Արեւելքի եւ Ասիայի միջեւ», — ասվում է Եվրոպական ներդրումային բանկի տարածած մամուլի հաղորդագրության մեջ եւ ավելացվում. «Այն նաեւ կդառնա Տրանսեվրոպական տրանսպորտային ցանցի առանցքային օղակը»։ 

Այս նոր ճանապարհային ենթակառուցվածքը կնպաստի կլիմայի փոփոխության հետեւանքների մեղմացմանը՝ ի հաշիվ ճանապարհորդության հեռավորությունների, տրանսպորտային միջոցների շահագործման ծախսերի եւ ճանապարհային պատահարների կրճատման: Այն նաեւ ավելի անվտանգ եւ արագ երթուղիներ կառաջարկի ճանապարհորդներին եւ ապրանք փոխադրողներին: Նախագիծը կնպաստի ՀՀ պակաս միակցված մարզի՝ Սյունիքի կայուն սոցիալ-տնտեսական զարգացմանը:

Իմացիր ավելին

Մամուլի հաղորդագրություն