ԵՄ-ն եւ Հայաստանը ամրապնդում են քաղաքացիական պաշտպանության ոլորտում համագործակցությունը

Առաջիկայում կայանալիք առաջին ԵՄ–Հայաստան գագաթնաժողովին ընդառաջ Եվրոպական հանձնաժողովի Եվրոպական քաղաքացիական պաշտպանության եւ մարդասիրական օգնության գործողությունների գլխավոր տնօրինությունը (DG ECHO) եւ Հայաստանի Հանրապետության ներքին գործերի նախարարությունը ստորագրել են վարչական պայմանավորվածություն՝ քաղաքացիական պաշտպանության ոլորտում համագործակցության վերաբերյալ։

Հայաստանում ԵՄ պատվիրակության մամուլի հաղորդագրության համաձայն փաստաթուղթը «նշանավորում է կարեւոր առաջընթաց աղետների դիմակայության բարձրացման ուղղությամբ» եւ «բացում է քաղաքացիական պաշտպանության ոլորտում համագործակցության նոր փուլ՝ ամրապնդելով արտակարգ իրավիճակների ժամանակ արձագանքման կարողությունները, տեղեկատվության փոխանակումը եւ կարողությունների զարգացումը»։

Վարչական պայմանավորվածության հիմնական ուղղություններն են․

• Արտակարգ իրավիճակներում տեղեկատվության փոխանակման ուժեղացում՝ աղետներին արագ եւ համակարգված արձագանք ապահովելու նպատակով.
• Փորձագիտական կարողության եւ լավագույն փորձի փոխանակում՝ թույլ տալով կողմերին միմյանցից սովորել եւ բարելավել աղետներին պատրաստվածության ապահովումը.
• Մասնակցություն համատեղ վարժանքներին, սեմինարներին եւ աշխատաժողովներին,
• Աջակցություն աղետների ռիսկերի կառավարման բոլոր փուլերում՝ կանխարգելումից եւ պատրաստվածությունից մինչեւ արձագանք եւ վերականգնում։

«Սույն վարչական պայմանավորվածությունն արտացոլում է Հայաստանի հետ մեր ամուր գործընկերությունը։ Այն հիմք է ստեղծում քաղաքացիական պաշտպանության ոլորտում առավել սերտ համագործակցության եւ համատեղ վերապատրաստման համար», — միջոցառման շրջանակում նշել է DG ECHO-ի գլխավոր տնօրեն պարոն Մաչեյ Պոպովսկին:

Նա հավելել է, որ ԵՄ-ի՝ առավել կայուն եւ դիմակայուն քաղաքացիական պաշտպանության համակարգ կառուցելու գործում Հայաստանին աջակցելու հանձնառությունը շարունակական է, ինչը նպաստում է ոչ միայն Հայաստանի, այլեւ ավելի լայն իմաստով տարածաշրջանային անվտանգությանը

Իմացիր ավելին

Մամուլի հաղորդագրություն