ԵՄ կողմից ֆինանսավորվող ծրագրի շրջանակներում միջոցներ կհատկացվեն` արձագանքելու Լոռու եւ Տավուշի մարզերում հեղեղների հետեւանքներին

ԵՄ կողմից ֆինանսավորվող «Տեղական դերակատարների զորեղացում հանուն զարգացման Լոռու եւ Տավուշի մարզերում» ծրագրի շրջանակներում միջոցներ կհատկացվեն` արձագանքելու հեղեղների հետեւանքով տուժած բնակչության հրատապ կարիքներին։

Անասնակերի եւ սերմացուի ձեռք բերման, ինչպես նաեւ գյուղատնտեսական եւ կենցաղային տեխնիկայի տրամադրման տեսքով աջակցությունը հասանելի կդարձվի «Տաշիր պլյուս», «Լոռվա ձոր», «ԳանՁոր» եւ «Աղստեւի հովիտ» տեղական ակտիվ խմբերի (ՏԱԽ) կողմից վեր հանված կարիքների հիման վրա։

«ՏԱԽ-երը Լոռու, Տավուշի եւ Շիրակի մարզերում տեղայնացված՝ տեղական իշխանությունների, բիզնեսների եւ քաղաքացիական հասարակության ներկայացուցիչներին համախմբող, ներառական, կայուն զարգացմանը եւ գյուղական համայնքների բնակիչների կենսամակարդակի բարելավմանն ուղղված ԵՄ ԼԻԴԵՐ մեթոդաբանության հիմնական դերակատարներն են»,- ասվում է Հայաստանում Եվրոպական միության պատվիրակության ֆեյսբուքյան էջի գրառման մեջ։

«Տեղական դերակատարների զորեղացում հանուն զարգացման Լոռու եւ Տավուշի մարզերում» ծրագիրը ֆինանսավորվում է Եվրոպական միության եւ իրականացվում՝ ՄԱԿ-ի Զարգացման ծրագրի կողմից՝ ՄԱԿ-ի Պարենի եւ գյուղատնտեսության ծրագրի հետ համագործակցությամբ եւ ՀՀ տարածքային կառավարման եւ ենթակառուցվածքների նախարարության հետ սերտ համագործակցությամբ։ Ծրագիրն օգնում է Լոռու եւ Տավուշի տեղական բնակչությանը ներգրավել զարգացման օրակարգի, որոշումների կայացման եւ իրականացման գործում:

Հունիսի սկզբին Հայաստանում ԵՄ դեսպան Վասիլիս Մարագոսը X-ի իր միկրոբլոգում (նախկինում՝ Twitter) հայտարարել էր, որ ՀՀ կառավարության խնդրանքով ակտիվացվել է Եվրոպական միության Քաղաքացիական պաշտպանության մեխանիզմը՝ ավերիչ ջրհեղեղների հետեւանքներին արձագանքելու նպատակով։

Իմացիր ավելին

Հայաստանում ԵՄ պատվիրակության ֆեյսբուքյան գրառում